भांगरभूंय | प्रतिनिधी
पणजी : बायंगिणीच्या कोयर वेवस्थापन प्रकल्पाक थळाव्यांनी सदांच विरोध केला. हे विशीं कोणें कितलेंय टँडर काडलें तरी कितेंच फरक पडना. ह्यान पयलीं तिगां जाणांनी टेंडर घेतिल्लें. मात थंय काम सुरू जावंक ना. चोवथे फावटीं कोणीच टेंडर घेवन काम सुरू करपाचो यत्न केल्यार सगल्यांत पयलीं हांव थंय वचून विरोध करतले अशें आमदार राजेश फळदेसाय हांणी सांगलें.
बिरेस्तारा पणजे जाल्ले पत्रकार परिशदेंत उलयतना फळदेसाय हांणी मुखार म्हणलें, कोयर वेवस्थापन प्रकल्पा लागसार बरीच लोकवस्ती वाडल्या. आयज थंय ८ हजार लोक रावतात. थंय लागींच शाळो, चर्च, हॉस्पिटल, मठ आसा. ही सुवात संवसारीक दायज सुवातांची आसा. अशें आसतना हांगा कोयर प्रकल्प येवपाकूच शकना. हे विशीं आमी मुख्यमंत्र्यांक मेळिल्ल्यान तांणी प्रकल्प जायनाशिल्ल्यान आस्वासन दिलां. म्हज्या मतदारसंघांत सगल्या लोकांचो ह्या प्रकल्पाक कायम विरोध उरतलो. हे विशीं मंत्र्यांची आनी म्हजी भुमिका वेगळी जरी आसली तरी हे विशी मुख्यमंत्र्यां वांगडा चर्चा करतले.
गवंडाळीच्या उड्डाण पुलाचें काम वेगान सुरू आसा. डिसेंबर वा जानेवारी म्हयन्या मेरेन हें काम पुराय जावपाची शक्यताय आसा. करमळी तळाच्या सोबितीकरणाचें टेंडर काडलें. फुडल्या म्हयन्यांत हें काम सुरू करतले. नव्यान बांदिल्लें पोरणें गोंय पुलीस स्टेशनाचें काम बेगीनूच सुरू जातलें. हांगा हजारांनी पर्यटक आयिल्ल्यान पुलीस स्टेशन गरजेचें आसा. ही सुवात सरकाराची आशिल्ल्यान बांदकामा खातीर गरजेचे सगले परवाने घेतल्यात.
श्री सप्तकोटीश्वर देवळाक लागून पर्यटन लागतलें चालीक
फळदेसाय हांणी, श्री सप्तकोटीश्वर देवूळ बांदपाचो निर्णय घेतिल्ले खतीर आमी मुख्यमंत्री डॉ. प्रमोद सावंत हांकां परबीं भेटयता. देवळाक लागून दिवाडेचें पर्यटन चालीक लागलें. दिवाडे खातीर दोन रो रो फेरी़ दिवप, रस्ते रुंदीकरण करप आनी हेर सुविधां विशीं आमी मुख्यमंत्र्यां वांगडा चर्चा करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
