झोपाळो

भांगरभूंय | प्रतिनिधी

फाटलें दिवसांकडे हांव शिरडी पाविलो. दर्शन बी जाल की सांजे मायत्याक अशेंत आजुबाजुक म्हाक फिरचो रोग तश खरेदी बी काय करचे उरना तरी बाजारात, जावु इतर जाग्यार फिरुक आवडता. आनी तर शिरडी खुप ओळख जाल कारणान कोण ना कोण तरी मेळतात. त्या दिवस खंडोबा देवळा बाजुच्यान आशिल्या ध्दारावती निवासस्थानाकडे म्हागेली पावलां चमकली. थोडे गांवा भायर जाल्यान गाडेची, लोकांली तशी वर्दळ कमीत. थंय निवासस्थाना लागी संस्थानान पोरां, जाण्टे लोकांक फीरुक बाग केल्ली आसा. मदेकात उदकांचे कारंजे, फुला झाडा, घसरघुंडी आनी तेजे बरा पोरांसाठी खास जास्ती अशें ल्हान व्होड झोपाळे आशिले.
झोपाळे आशिल जाग्यार ही गर्दी आशिली. थंयीत एक पाटेर बरयीले की हे झोपाळे फक्त ल्हान पोरांसाठीच म्हण. तरी थंय पळयल्यार ल्हान पोरां पेक्षा तेमगेल आवय बापुय आनी पालकत ह्या झोपाळ्यार बसुन मनसोक्त आनंद घेताले. हे पळोवन एक नमन्याचो आनंद जालो खरो पुण हे झोपाळे पोरांसाठी काय व्होडासाठी हेत्त कळते नाशिले. तेतुत बरीत पोरां त्या झोपाळ्यार बसुक आपल्याल नंबर केन्न येतल काय म्हण वाट पळयते आशिले.
झोपाळे पळोवन हांव आमगेल काजुवाड्यार काजु रुखा पोंदा केन्न पावलो ते कळ्ळेत ना. केन्न मे म्हयन्या रजा पडता आनी केन्न कारवार पावता अश जाताले. पुण बाबाक रजा केन्न मेळतली हेज पयली वाट पळोवची पडताली तरी आमी जरा व्होड जाल की आई बाबा सोडन्नत कारवारची वाट धरताले तरी तेन्न आयच्या म्हणकी फोन जावु मोबाइल नाशिले. आमी फक्त झोपाळ्या आशेन कारवार धाव मारतात हे आई बाबा खबर आशिले. कारवार पावले बरा खुशालीचे पत्र आई बाबाक धाडले की मागीर आमी धुडगुस घालुक मेकळे. तश आमगेल बागात काजु रुख आशिले खरे पुण ते जास्त बागोवन दुसऱ्याल बागात पावीले तरी एक बाजुचे बाग बंजर उरताले तर त्या बागात पाविल्या काजु रुखाक आमका आमगेल आत्या भांयी राजवाचो झोपाळो बांदुन दिताले. तरी वाड्यावयली इतर आमगेल वयाची पोरां बी त्यात रुखाक आनेक बाजुन झोपाळो बांदताले. अश कन्न बागात पोरांलो कल्लेव उरतालो. ह्या कल्लेवान माकड मातर कमीत येताले अश जावन आमकां भरपुर आंबे आणी भिंडा खावु मेळताले.
हो झोपाळो बांदचे पयली आत्या आमगेल कडल्यान बरें जाडजूड अशें माडा शेल्यान त्या काजु रुखा पोंदातलो पुराय जागो चोक्क कन्न पुराय झाडन्न घेताले. कारण आमगेल पायाक कांटे जावु सखरें लागनयो म्हण आनी आमी चवथी वेळार सुरसुरकाडी पेटोवन अर्ध जळ्ळ की ती काडी वयर काजु रुखाक मारताले खंयी आमगेल नशीबान मारील सुरसुरकाडी काजु पानां शिरखताली तेन्न ती रुखार पेटची सुरसुरकाडी आमकां कोण नमन्यान आनंद दिताले ते सांगुक शब्द कमी पडतात. आनी आत ती जंगेल्ली काडी बी पाया लागत म्हण हो रुखा पोंदातलो वाठार झाडन्न घेताले. तशें गांवात आमगेल्या बोंडीत माती एक कुकडाक शेखरे मारतल म्हणार मेळचे मुश्कील उरताले.
आमी शहरात ल्हान व्होड जाल्ले कारणान आमकां सहसा रुखार चडुक जमन आशीले तरी आत्या रुखार चडुक पैला नंबर. तेत्त आमकां काजु रुखाक झोपाळो बांदुन दिताले. झोपाळो तयार जालो की तेजेर पयली कोणे बसच्चे हेजेर वाद जातालो. ह्या वादाचेर आत्यालो उपाय तयार उरतालोत. तो उपाय म्हणलार जो कोण सकाळी बेग्गी उठुन भांणा रान्नी उजो घालता,बागात पडीले रिठे इचुन,आणी फोगा बी इचुन आंगणात घातला तेणे पयली झोपाळ्यार बसच्चे. मागीर सकाळी उठुक बी हांव पयली काय तु पयली हे सुरु जाताले. पुण शाळे वयतना वेळ जाल तरी बोडांवयल्यान चादर सखल देवन जाल्ली आत ह्या झोपाळ्या पायांन चादर बोडार उरत नाशीली म्हणलार जाता.
आमगेल झोपाळ्यावयलो खेळ अती जाल की आमकां त्याच माडा शेल्यान मार बी पडतालो. त्या झोपाळ्या पायान ना च्याचे भान ना जेवणाचे. मागिर आत्याक राग येतालोत. तरी ते आमकां भंय घालताले दनपार भारार थंय भुत फीरतात तेन्ना हुनत मोव जाल की झोपाळ्यार खेळु चला. तेन्ना वयत तसले करनाक म्हणील काम मुद्दम करचे आनी मार खावचो. आत्या तर एक एकेकपटी झोपाळो वयर खांद्यार उडयताले. मागीर आमगेली तर गोची जाताली. तरी दनपारां आत्याल दोळो लागलोसो पळोन कण्णाबडी घेवन तो झोपाळो सखल काडताले आनी परत आमगेल खेळ सुरु जातालो. आमगेल आवाज ना तरी त्या झोपाळ्याचो कर्र कर्र आवाज जातालो ना तरी त्या रुखा पानांचो आवाज जातालो. तरी भावाल पोरां दोन दिवसांसाठी रजेत येयला तर खेळु म्हण आत्या बी एक एकेकपटी गप्प रावताले.
आज फाटी पळयताना आमगेल बाग तेत्त आसा. पुण बागात एक नांवाक काजु रुख ना. आमी आत व्होड जाले नोकरे आनी कामा धंद्या निमतान खंय खंय पावले. आत तर सगळे दिवस एकत. मे म्हयन्या रजा आमकां इतिहास जमा जाली. आत्या तर कन्न की फोटवात आनी मनाच्या यादीत वचुन बसले. आज तो काजुरुख ना तरी त्या जाग्यार काट्यां झाडाचे रान मातला. हे सगळे कमी म्हण इंदिरागांधी झुडपातर मळबाक तेकलात. त्या जाग्यार पळयल्यार खरेंत आमी एक काळाचेर हांगात झोपाळ्यार खेळताल काय हो प्रश्न पडल शिवाय रावना.
आज पळयल्यार आधुनिक घरात व्हरांड्यात ,गँलरीत झोपाळे येयलात. ते कीत्याक बाजारात, जात्रेत. सुध्दा अशे लोखंडाचे तरतरेचे झोपाळे विकु येयीले पळोवु मेळतात. आत तर व्होड व्होड घरात भायर तगडाचो आडस कन्न आधुनिक झोपाळो बांधील उरता. थोडे कडे बेंताचो बी झोपाळो उरता तेतुत बी तरतरेचे आकार आशीले. तरी आमी ज्या काजुरुखा वयल्या झोपाळ्याचेर बालपण घालयले तरी सर ह्या आधुनीक झोपाळ्यार केन्नात येना. सुंभा राजवाचो कुलाक जो खुप वेळ बसल नंतर चुरचुरो पडतालो तेजो आनंद आनी दुख आमगेल पिळगेकत खबर आसा. एक
काळार झोपाळ्या पिशें आशिले पुण आज ह्या आधुनिक झोपाळ्यार बसुक मन फाटीफुडे
जाता कारण तेतुक पयलीच्या झोपाळ्याची मजा ना आनी आत ह्या वयार आमकां आनी
झोपाळो कोणे सांगला ?? हो प्रश्न मनात पडता म्हण.

संदेश बांदेकर
9480790172