भांगरभूंय | प्रतिनिधी
गीतकार मजरुह सुलतानपुरी गोंयांत आयिल्ले काय नात, तें खबर ना, पूण तांणी ‘बार बार देखो, हजार बार देखो’ हें गीत गोंयांतले बार पळोवनूच बरयलां आसतलें, अशें म्हणल्यार अतिताय थारची ना. हातूंतलो विनोद कुशीक दवरलो तरी, गोंयांत पावला पावलार परत परत बार दिसतात, हें कोणूय मान्य करतलो. गोंय हें पर्यटन राज्य जाल्ल्यान अर्थीक येणावळी खातीर बार्रांची गरज आसा, अशें जायते वायंगणें विचारवंत सांगतात. मात, बार्रांक लागून हजारांनी गोंयकार पिरायेची चाळीशी हुपचे पयलींच संवसाराक अंतरल्यात. बायल, भुरग्यांक तांणी लजेक घाल्यात. मानसीक, अर्थीक त्रास दिल्यात. कदंब म्हामंडळान आतां सोऱ्याचे नशे आड पावलां उखलपाचें थारायलां. येश मेळटलें काय ना, हो फुडलो विशय, पूण तांणी यत्न तर सुरू केल्यात. देखून तांकां परबीं.
खंयच्याय ड्रायव्हराच्या हातांत प्रवाशांचो जीव आसता. तेन्ना ताणें दुयेंत आसूंक फावना, नशा, जागरण केल्लें आसपाक जायना. कदंब बशीचे चालक सोरो पियेवन बसी चलयतना सांपडल्यात, अशें खुद्द म्हामंडळाचे अध्यक्ष, वेवस्थापकीय संचालक सांगतात. सगल्याच ड्रायव्हर, कंडक्टरांचें समुपदेशन करपाचो तांणी निर्णय घेतला. निदान ड्युटेर आसतना तरी तांणी सोऱ्याचो घोंट पसून घेवपाक जायना. सोऱ्याचे वायट परिणाम, ताचो कामाचेर, फुडाराचेर, संवसाराचेर, बायल- भुरग्यांचेर कितें परिणाम जाता, तें तांकां पटोवन दिवपाक जाय. अचकीत अल्कोमिटर वापरून चांचणीय घेवपाचें थारलां. म्हामंडळाक वेगळेवेगळे उपाय करचे पडटले. सोऱ्याचें वेसन सहसा सुटना. कारण दुख्ख जाल्यार, ताण आयल्यार, खोस जाल्यार बेबदो सोरो पियेता. ‘पिनेवालों को पिने का बहाना चाहीए’ म्हणटात तें खरें! समुपदेशन करूनय कर्मचारी सुदरनात जाल्यार मात तांच्या हातांत सरळ नाल्ल दिवचो पडटलो. ड्रायव्हर, कंडक्टर खोटल्यांनी मेळटात. चड तेंप रिकामी उरपा सारकीं तीं पदां न्हय. कदंबान हालींच 179 पदां खातीर जायरातूय दिल्या. तातूंत 90 ड्रायव्हर आनी 72 कंडक्टर आसात. दिसवड्याच्या कोंतार तांकां घेतले. तातूंतले बरे आसात, तांकां कायम नोकरेंत कित्याक घेनात?
कदंब म्हामंडळ हें नीम सरकारी आस्थापन. 1980 च्या दसऱ्याक सुरू जाल्लें. अजून फायद्यांत येना. कांय वर्सांनी भांगरा उत्सव जातलो. तो मेरेन ते फायद्याांत हाडपाक कितें उपाय घेवचे पडटले, हाचो विचार जावंक जाय. तीन वर्सां पयलीं कांय तरणाटे मुखार सरिल्ले, पूण म्हामंडळाच्या आनी सरकारी खात्यांच्या अधिकाऱ्यांक तेन्ना वेळ नाशिल्लो खंय. निदान आतां तांणी वेळांत वेळ काडून हे उपाय जाणून घेवं येतात. खर्चाचेर नियंत्रण दवरल्यार कांय समस्या सुटाव्यो जातल्यो. दुसरी गजाल, कदंब म्हामंडळान पावल उबारलां, तशें हेर सरकारी खात्यांनी कित्याक उखलचें न्हय? तांणीय आपल्या कर्मचारी, अधिकाऱ्यांचेर लक्ष दवरून तांचें समुपदेशन करचें. आयज प्रत्येक खात्यांत पंचींग कार्ड वापरतात. आतां वांगडा अल्कोमिटरूय दवरपाचो वेळ येतलो. काय आयला? दुबाव मारलो काय त्या तळीरामाक तपासपाचो!! तिकेट चेकर आसतात, तशे ते खातीर खास पंगडूय तयार करूं येतात…. आनी खाजगी बशींचें कितें? तांच्याय ड्रायव्हर, कंडक्टरांचेर लक्ष नाका? खाजगी गाडयांचेर पुलिसांचें लक्ष आसता. बेबद्या ड्रायव्हरांक तालांवूय पडटात. मात, परिस्थिती तशी सुदारूंक ना. सोरो पियेवप आतां स्टेटस सिंबाॅल जावपाचें तितलें उरलां!
प्रवाशांचो कदंबाचे सेवेचेर विस्वास कायम उरचो म्हूण हो निर्णय घेतला, अशें म्हामंडळाचें म्हणणें. सध्या कदंबाच्यो बऱ्योच बशी बंद आसात. आयतार, सुटयेच्या दिसा दांडयो मारतात. मदींच ब्रेक डावन जातात. मुखेल मार्गांचेर हें घडटा. म्हणटकूच गांवांनी कितें जाता आसतलें, तें थळावेच सांगपाक शकतले. ओगीच खाजगी गाडयो वाडूंक नात. यंत्र म्हणटकूच मोडटलेंच, पूण हें कित्याक जाता, ताचो अभ्यास जाय. कदंबाचे येणावळीक खंय गळटी लागल्या, ते बुराक पुरोवपाक कितें करचें पडटलें, हाचेरूय म्हामंडळाची खास बसका जावंक जाय.
कदंब म्हामंडळान राज्याच्या समाजीक जिणेंत क्रांती घडयल्या. खेडेगांवांतले लोक कामाक वतात, ताचें बरेंचशें स्रय कदंबाक. म्हामंडळ फक्त फायद्याचोच विचार करिना, तर समाजसेवा हो ताचो मुखेल उद्देश. तरीय उपाशी पोटार जगप शक्य नासता, हाचीय जाणीव तांणी दवरल्यार बरी!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
