भांगरभूंय | प्रतिनिधी
पणजी: गोंयांत जावपी जिल्लो पंचायत वेंचणुकेंत भाजपाक हारोवपाक सगल्या पक्षांनी एकठांय येवप गरजेचें आनी हें कॉंग्रेसीचें ठाम मत जावन आसा, अशें पक्षाचे प्रदेशाध्यक्ष अमित पाटकार हांणी स्पश्ट केलें. पक्षाच्या प्रदेश वेंचणूक समितीचे बसकेंत जिल्लो पंचायत उमेदवारांची नांवां बेगीनूच मंजूर करून जाहीर करतले.
अमित पाटकार हांणी मुखार सांगलें, राज्यांतल्या सगल्या ५० सुवातांचेर युतीचे उमेदवार उबे आसतले. ज्या मतदारसंघांत जो पक्ष घटमूट आसा आनी जो पक्ष काम करता, अशा सुवातांचेर चर्चा आनी नियोजन करूनच युतीची घोशणा करतले. युती विशीं विवीध पक्षांच्या मुखेल फुडार्यां वांगडा आतां मेरेन तीन बसका जाल्यात, युतीची घोशणा बेगीनचू करतले.
वेंचकुणेच्या तराखां विशीं पाटकंर हांणी राज्य वेंचणूक अधिकार्यांचेर तिडक उक्तायत म्हणलें, आदीं १३ डिसेंबराक मतदान आशिल्ल्याचें जाहीर केलें आनी दोन दिसां पयलीं मतदानाची तारीख फुडें धुकलून २० डिसेंबराक आशिल्ल्याचें जाहीर केलें. हाका लागून राज्य वेंचणूक अधिकारीच वेंचणुके खातीर तयार ना अशें दिसून येता, अशें तांणी मुखार म्हणलें.
तांणी राज्यांतल्या वाडपी दरोड्यांविशीं सरकार आनी पुलीस यंत्रणेचेर तिडक उक्तायली. फाल्यां २० नोव्हेंबर, राज्यांत सुरू जावपी आंतरराष्ट्रीय चित्रपट महोत्सवा खातीर, डिसेंबर म्हयन्यांत जावपी सेंट फ्रान्सिस झेवियरच्या ’फेस्ता’ खातीर तशेंच नव्या वर्साच्या येवकारा खातीर गोंयांत येवपी देशी आनी परदेशी पर्यटकांक गोंय हें गुन्यांवकारी राज्यां आसा हें दाखोवपाचो भाजपाचो यत्न आसा, असो गंभीर आरोप तांणी केलो.
राज्यांतील्या लोकांचीं घरांच सुरक्षित नात, अशेंय तांणी भापाजपा सरकाराक म्हणलें. कायदो आनी सुव्यवस्थेची स्थिती पुरायेन हाल्ल्या, कॉंग्रेस पक्ष देशाचे गृहमंत्री अमित शहा हांकां हातूंत लक्ष घालपा खातीर तांणी उलो मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
