भांगरभूंय | प्रतिनिधी
पणजीः दक्षीण आनी उत्तर गोंयांत झेडपी भवन बांदपा खातीर सुवात सोदतात. एकदां सुवात निश्चीत जालें उपरांत रोखडींच फुडलीं पावलां मारतले, अशी म्हायती पंचायत मंत्री मावीन गुदिन्हो हांणी दिली.
नावेलेचे आमदार उल्हास तुयेंकार हांणी दक्षीण गोंय झेडपी कार्यालयांत कर्मचार्यांच्या उणावाचो प्रस्न काडिल्लो. ताका जाप दितना गुदीन्हो हांणी सरकारी कर्मचार्यांचो उणाव आसा हें मान्य केलें.
ज्या सरकारी खात्यांनी अतरिक्त कर्मचारी आसात ते दक्षीण गोंय झेडपी कार्यालयांत धाडपाचो प्रस्ताव सरकारा मुखार दवरला. जेणे करून तांत्रिकी कर्मचारी येवन जे प्रस्ताव आसात ताका बेगीनूच मान्यताय मेळटली.
झेडपी स्थापन जावन २५ वर्सां मायज जालीं आनी दोन-तीन म्हयन्यांनी फुडली झेडपी वेचणूक येवपाची आसा. इतलीं वर्सां जावन लेगीत प्रशस्त अशें झेडपी भवन गोंयांत ना. सरकारान हे खातीर यत्न करपाक जाय. गोंयां केन्ना झेडपी भवन येतलें, असो प्रस्न तुयेंकार हांणी केलो.
हे विशीं जाप दितना गुदीन्हो हांणी सांगलें, सद्या झेडपी कार्यालयां भाड्याचें शुल्क भरता तें पळोवन झेडपी भवनाची गरज आसा.
उत्तर आनी दक्षीण गोंयांत दोनूय कडेन प्रशस्त अशें झेडपी भवन जावचें म्हण सरकारान सुवात सोदपाची प्रक्रीया चालिक लायल्या. एकदां आमका सुवात मेळ्ळी काय हें भवन उबारपा खातीर रोखडीच फुडलीं पावलां मारतले. उत्तर आनी दक्षिणेंत झेडपी भवन हें येतलेंच, अशें आस्वासन मंत्र्यान दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
