भांगरभूंय | प्रतिनिधी
इराणान आखातांतले अमेरिकेचे लश्करी तळ नश्ट केले तरीय एकाय मुस्लीम देशान इराणाचेर प्रतिहल्लो करूंक ना. हाचो अर्थ….
खरें, फट कोणाक खबर ना, पूण इराणान खंय अमेरिका आनी इझ्रायला वांगडाच्या झुजांत दिमी मारल्या. फाटले दोन दीस अमेरिका आनी इराणा मदीं भासाभास जाली आनी अमेरिकेन इराणाच्या वीज प्रकल्प आनी उर्जेच्या बुन्यादी सुविधां वयले हल्ले पांच दीस रद्द केले. ह्यो वाटाघाटी चालूच उरतल्यो, अशें अमेरिकेचे अध्यक्ष डोनाल्ड ट्रम्प हांणी काल जाहीर केलें. आखाती वाठारांतलो तणाव निवळपणाचे दिशेन हें म्हत्वाचें पावल थारतलें, अशेंय तांणी सांगलें. इराण म्हणटा, तशी चर्चा जावंकूच ना. इंधनाचें मोल देंवचें म्हूण ट्रम्प फटी मारतात. दुस्मान हारलो, अशें सांगून कोणूय फाटीं सरूं, पूण हें झूज थारप म्हत्वाचें. कारण 80 टक्के मनीसजात इंधनाची गुलाम जाल्या. ताचे बगर ती जगपाक शकना आनी संवसारांतलें 60 टक्के इंधन आखाती वाठारांतल्यान येता. झूज थांबोवपाक पाकिस्तान, इजिप्त आनी तुर्कियेन मध्यस्थी करपाची तयारी दाखयल्या खंय. खरें म्हणल्यार भारतान मुखार सरपाक जाय आशिल्लें, अशी टिका आतां विरोधक सरकाराचेर करपाक लागल्यात.
प्रधानमंत्री नरेंद्र मोदी हांणी काल लोकसभेंत झुजाचेर भाश्य केलें. झुजाचो दीर्घकाळ परिणाम जावंक शकता. ते खातीर तयार रावपाक जाय. आमी कोविडाच्या काळांत हे तरेचें आव्हान स्विकारिल्लें. एकवटान हे समस्येक तोंड दिवपाक जाय, अशें तांणी सांगलें. नागरी वस्ती, येरादारी, उर्जा प्रकल्पां वयल्या हल्ल्याक भारताचो विरोध आसा. होर्मुझ उदका मार्गाचेर जें कितें चल्लां, तें स्विकारपा सारकें ना, अशेंय तांणी म्हणलें. फाटल्या कांय वर्सां सावन केंद्र सरकार सौर उर्जा, इथेनाॅलाचेर भर दिता. इलेक्ट्रीक गाडयांक उर्बा दिता. तांचो वापर वाडलो जाल्यार इंधनाची बचत जातली. सरकारी पांवड्याचेरूय गाडयांचो वापर जाता, तो उणो जावंक जाय. जंय सगल्यांत चड इंधनाचो वापर जाता, थंय सैमीक इंधनाचो वापर वाडटलो, हे खातीर खाशेले यत्न जावप गरजेचें.
इराणांत अडेज हजार लोकांक मरण आयलां. चडशीं भुरगीं. अमेरिकी, इझ्रायली नागरिकूय मेल्यात आसतले. गरज नासतना, लोकांची कत्तल अशें हे घडणुकेचें वर्णन करचें पडटलें. इराणान झूज थांबोवपाक चार अटी दवरल्यात. आखातांतले अमेरिकी लश्करी तळ बंद करप, होर्मुझ खातीर नवे नेम करप, इराण विरोधी पत्रकारांचेर केशी चलोवन तांकां ताब्यांत दिवप. (मागीर तांकां फांसार दितले, हें वेगळें सांगपाक नाका.) फुडाराक झूज जावचें ना हाची हमी आनी आतां मेरेन लुकसाण जालां, ताची भरपाय. मात हें सगलेंच इझ्रायल, अमेरिका मान्य करप अशक्य दिसता. इराणाची एकूणच भुमिका पळयल्यार ती जिखूं वा मरूं अशा प्रकराची म्हणची पडटली.
आखाती देशांनी दर्याचें खारें उदक शुद्ध करपाचे प्रकल्प आसात. ते फोडपाचो इराणाचो विचार आसा. इराणान आखातांतले अमेरिकेचे लश्करी तळ नश्ट केले तरीय एकाय मुस्लीम देशान इराणाचेर प्रतिहल्लो करूंक ना. हाचो अर्थ तांचो भितरल्यान एकमेकांक तेंको आसा, असो घेवपाचो? दुसरे वटेन देशांत गॅस सिलिंडरांचो उणाव आसा. आतां मेरेन फक्त चार बोटी आयल्यात. आमकां दिसाक एक बोट लागता खंय. सध्याच्या 14.2 किलांच्या सिलिंडरांत 10 कील गॅस भरून दिवपाचो विचार सरकारी तेल कंपनीं करतात, अशी खबर आसा. ती खरी जाल्यार, गॅस सिलिंडराचें मोलूय उणें जातलें. सध्या सौर उर्जा आनी लायटी वयल्या शेगड्यांचो चडांत चड वापर जावंक जाय. चुलीचो वापरूय म्हत्वाचो. गाडयांचो वापर उणो करचो. चडांत चड देशांतल्यान इंधन, गॅस आयात करपाचेर सरकारान भर दिलो, जाल्यार इंधन टंचायेचें संकश्ट
उणें जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
