भांगरभूंय | प्रतिनिधी
जर हें झूज आनीक कांय दीस चलत उरलें जाल्यार रांदचेकुडींत गॅसीचो उणाव निर्माण जातलो.
अमेरिका आनी इझ्रायल ह्या देशांनी इराणाचेर केल्ल्या हल्ल्याक बारा दीस जावन गेले तरी झूज थांबपाचें नांव घेना. हें झूर जरी आखातांत सुरू आसलें तरी ताची झळ मात जगाक बसतली अशें म्हज्या ‘आखातांतल्या झुजाची जगाक झळ’ ह्या लेखांत बरयिल्लें. ह्या झुजाची झळ जशी जगाक बसता तशी भारताकूय बसत आसा, आनी ह्या झुजाचे धगीक लागून देशांतले सर्वसामान्य नागरीक मात हुलपून वचत आशिल्ल्याचें दिसून येता. हें झूज आतां भारतीयांच्या रांदचेकुडींत पावलां. इराण अमेरिका झुजाक लागून देशांत गॅसाचो उणाव निर्माण जाल्ल्यान गॅस वितरक कंपनींचे कचेरे मुखार लोकांच्याे लांबच्यो लांब रांको लागिल्ल्याचें चित्र पळोवंक मेळटा. पेडण्यां गॅसी खातीर लागिल्ली लोकांची रांक ही एक देख जावन आसा.
रांदपाचो गॅस म्हळ्यार जिणेगरजेची सामकी म्हत्वाची गरज. जर हें झूज आनीक कांय दीस चलत उरलें जाल्यार रांदचेकुडींत गॅसीचो उणाव निर्माण जातलो आनी रांदूंक गॅस मेळचो ना अशी भिरांत सर्वसामान्य लोकां मदीं पातळ्ळ्या, आनी ह्याच कारणाक लागून गॅस मेळोवपा खातीर यत्न करीत आसात. ते खातीर वरांचीं वरां रांकेंत उबे रावन गॅस मेळोवपाचो यत्न करतना दिसून येता. सरकार सर्वसामान्यांक थाकाय दिवपाचो यत्न करीत आसलें तरी टीव्ही वयल्यो बातम्यो पळोवन सर्वसामान्यां मदीं हुस्को निर्माण जाला. तातूंत सरकारान गॅसीच्या मोलांत 60 रुपया इतलो घसघशीत वाडोवन फुडारांत गॅसीचे दर आनीक वाडटले अशीय भिरांत निर्माण जाल्या.
सरकारान घरगुती गॅसीक प्राधान्य दिवपा खातीर वेवसायीक सिलिंडराचें बुकींग थांबयलां आनी एकंदर बुकिंगेची मुजत 25 ते 30 दिसां मेरेन व्हेल्या. ताका लागून नागरिकां मदीं आनीक भिरांत पातळ्ळ्या, आनी ह्याच कारणाक लागून सगली कडेन एकाच वेळार नोंदणीचें सत्र सुरू जालां. एकाच वेळार सगली कडेन नोंदणी जावंक लागिल्ल्यान नोंदणी करपाक अडचण येवंक लागल्या. ताका लागून नागरीक आनीक मेटाकुळेक आयल्यात. सर्वसामान्य नागरीक घरगुती गॅस मेळत नाशिल्ल्यान निरशेला जाल्यार वेवसायीक सिलिंडराची पुरवण सरकारान बंद केल्ल्यान हॉटेल वेवसायिकांचेर हॉटेलाक कुलप लावपाची वेळ आयल्या. हॉटेल बंद जाल्यार ताचेर आदारून आशिल्ल्या हजारांनी कर्मचाऱ्यांच्या रोजी रोटीचो प्रस्न निर्माण जाला. पूण गोंयांत घरगुती सिलींडर वापराचेर कसलेच निर्बंद नात. वेवसायीक गॅस सिलींडराच्या वापराचेर मात कांय प्रमाणांत निर्बंद आसात. वितरकां कडेन एलपीची सिलिंडराचो फावो त्या प्रमाणांत सांठो आसा. हाका लागून लाेकांनी भिरांत बाळगुची न्हय अशें गोंयच्या मुखेल सचिवांनी म्हणलां. घरगुती गॅस सिलिंडर उपलब्ध आसा आनी वेवसायीक सिलिंडराची समस्या जाल्या. लोकांनी भियेवपाची गरज ना. हो विशय बेगीन सुटावो जातलो, अशें गोंयच्या मुख्यमंत्र्यांनी स्पश्ट केलां.
घरगुती गॅसी प्रमाणूच सिएनजी गॅसीचोय उणाव जाणवूंक लागिल्ल्यान सिएनजी पंपाचेर रिक्षा आनी वाहनांच्यो लेगीत रांको लागिल्ल्याचें पळोवंक मेळटा. गॅसीच्या उणावाक लागून कांय कंपनींनी आपलें कामकाज बंद केलां. एकूणच ह्या झुजाक लागून देशांतले नागरीक बेजारल्यात. अर्थांत हें जावपाचेंच आशिल्लें. हाची पूर्व कल्पना सगल्यांकूच आशिल्ली. अमेरिका आनी अमेरिकेचीं इश्ट राष्ट्रां आशिल्ल्या देशांचें नाक दामून दवरपा खातीर इराणान हॉर्मुझचो दर्या रस्तो बंद केला. ताका लागून त्या मार्गान भारतांत येवपी इंधनाची पुरवण बंद जाल्या.
देशाचे गरजे पैकीं 60 टक्के एलपीजी गॅस आमी आयात करतात आनी तातूंतले 80 टक्के एलपीजी हो आखाती देशांतल्यान हॉर्मुझ मार्गान भारतांत येता. तो मार्ग बंद जाल्ल्यान देशांतली 30 टक्के गॅस पुरवण बादीत जाल्या. हें जावपाचेंच आशिल्लें हाची कल्पना सरकाराकूय आशिल्ली. पूण सरकारान राखीव सांठो वा फावोती पर्यायी वेवस्था करूंक नाशिल्ल्यान हें परिणाम जायत आसात.
हें झूज केन्ना थांबतले हें कोणूच ठामपणान सांगूंक शकना. हें झूज आनीक कांय दीस चलत जाल्यार ताचे परस भिरांकूळ परिस्थिती निर्माण जावंक शकता म्हूण सरकारान पर्यायी वेवस्था आनी सुरळीत पुरवण अशा दोनूय आघाड्यांचेर झुजा पांवड्यार पावलां उबारपाची गरज आसा.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
