भांगरभूंय | प्रतिनिधी
मुरगांव आनी पणजी वाठारांत जातलें मॉक ड्रील
पणजी : पहलगाम हल्ल्या उपरांत १९७१ वर्साच्या बांगलादेश झुजा सारकी स्थिती सध्या पुराय देशांत निर्माण जाल्या. जर झूज पेटलेंच जाल्यार जनतेक संवेदनशील करपाचे तयारेचो भाग म्हणल्यार फाल्यां जावपी मॉक ड्रील, अशें मुख्यमंत्री डॉ. प्रमोद सावंत हांणी म्हणलें. गोंयांत मुरगांव बंदर, दाबोळी, वास्को आनी पणजे मॉक ड्रील जावपाचें आशिल्ल्यान जनतेन सहकार्य करचें, असो उलो डॉ. सावंत हांणी मारलो.
एनसीसी, एनएसएस, गृह रक्षक दळ, आपदा मित्र हांणी आपत्कालीन स्थितींत कशे तरेन काम करप गरजेचें आसा, हाचीय तयारी आसा. आयज मॉक ड्रील संबंदी गृह सचिवां वांगडा व्हिडियो कॉन्फरसिंगा वरवीं बसका जाली. मुखेल सचीव, गृह सचीव, जिल्लोधिकारी हे बसकेक हजर आशिल्ले. राज्यांत जावपी मॉक ड्रील संबंदी आयज सांजवेळा मेरेन आराखडो तयार जातलो, अशें डॉ. सावंत हांणी म्हणलें.
रेडिओ, दूरदर्शना वरवीं सुचवण्यो तशेंच संदेश दितले. ह्यो सुचवण्यो पाळपाची नागरिकांची जापसालदारकी. प्रधानमंत्री नरेंद्र मोदी हे देशाचे सुरक्षे खातीर गरजेचीं पावलां उबारतात. तांकां प्रत्येक गोंयकारान फाटबळ दिवपाची गरज आसा, अशेंय डॉ. सावंत हांणी मुखार सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
