भांगरभूंय | प्रतिनिधी
झुवारी जमीन: ५० लाख कोटींचो घोटाळो; सरदेसाय हांचो आरोप
पणजीः झुवारी एग्रो कॅमिकल्सांक दिल्ले कोम्युनिदादीचे सुवातेचो वापर प्लॉटींग करपा खातीर जाला. फकत उद्देगां खातीर ५० लाख चौ. मि. सुवातेचो गैरवापर जाल्ल्यान ५० लाख कोटींचो जमीन घोटाळो जाला असो गंभीर आरोप फातोड्डेंचे आमदार विजय सरदेसाय हांणी केलो. हाचेर जाप दितना मुख्यमंत्री डॉ. प्रमोद सावंत हांणी, हो घोटाळो म्हज्या सरकारान करूंक ना अशें सांगलें. जाल्यार महसूल मंत्री बाबूश मोन्सेरात हांणी तें कोमुनिदादीचेर धुकल्लें.
प्रस्न जापेच्या काळांत विजय सरदेसाय हांणी सभाघरांत सांगलें, आदले मुख्यमंत्री भाऊसायब बांदोडकार हांणी कोमुनीदादाची सुवात उद्देग सुरू करून रोजगार तयार जावचे म्हण झुवारींक दिल्लो. तिचो आफ्रामेंत फक्त उद्देगा खातीरूच दिल्लो. ताचो वापर दुसर्या गजाली खातीर करपाक मेळना. मात आतां ह्या आफ्रामेंतांचें प्लॉटींग करून लोढा ह्या बिल्डरांक दिल्यात. हे सुवातेचेर ज्यो सनदी जाल्यात त्यो सरकारान रद्द करच्यो, अशी मागणी सरदेसाय हांणी केल्या.
हाचेर जाप दितना मंत्री मोन्सेरात हांणी सांगलें, झुवारीची जमीन ही धनयान विकती घेतल्या आनी सरकार कांयच करपाक शकना. हो ५० लाख कोटीचो जमीन घोटाळो आसा असो आरोप सरदेसाय हांणी केलो.
मुख्यमंत्र्यान ह्या आरोपाची दखल घेत सांगलें, हो जमीन घोटाळो आमच्या सरकारन करुंक ना.
तशेंच हे विशीं ओदागाद झिल्मन हांणी अहवालात म्हणलें, सरकार ही जमीन परत घेवपाक शकना. सरकाराक जाय जाल्यार ही जमीन संपादीत करची, अशी जाप मोन्सेरात हांणी दिली. उपरांत मंत्री आनी सरदेसाय हांचे मदीं उतरांचें गेर्र पेटलें.
सरदेसाय हांचे आरोपांक जाप दितना मंत्री मोन्सेरात हांणी सांगलें, कोम्युनिदाद आपले जागे वाटोवपा खातीर अपेसी थारलां. कोमुनिदाद ही स्वतंत्र्य संस्था आनी सरकार हातूंत कसलीच मध्यस्थी करपाक शकना. जीं बेकायदेशीर बांधकामां कोमुनिदाद सुवातेंत आयल्यांत ताका कोमुनिदादच जापसालदार आसा, असो आरोप मोन्सेरात हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
