भांगरभूंय | प्रतिनिधी
अमेरिकेच्यो आदल्यो राजकी सचीव हिलरी क्लिन्टन, भारताच्यो पयल्यो अस्तुरी प्रधानमंत्री इंदिरा गांधी, गोंयच्यो आतां मेरेनच्यो एकल्योच अस्तुरी मुख्यमंत्री शशिकला काकोडकार ह्यो राजकारणांतल्यो आदर्श. तांची याद फुडारांत राजकारणांत येवपी अस्तुरेन दवरची. तांची निर्भय आनी स्वतंत्रपणान आपले विचार परगटावपाची, प्रसंगार कठीण निर्णय घेवपाची नीत हीच अस्तुरीनीत. हालींच्या अमेरिकेंतल्यो राजकारणी कमला हॅरीस हांच्या झुजावरी.
विचारांनी, उतरांनी झुजपाची तांक राजकारणांत येवपी अस्तुरेक आसपाची गरज आसा. तेंपा प्रमाण कुरपणें घालत ती बसली, चलली, समेस्तां वांगडा रावली जाल्यार तिका फुडें वचपाची संद मेळटा. दुसऱ्यांक लुटचे परस तांचें प्रस्न जाता तितले बेगीन सुटावे करप, मतदारां मेरेन पावप, राज्यार येवपी अरिश्टा वेळार सरकारा वांगडा रावन सुचोवण्यो करपाची धिटाय अस्तुरेक दाखोवची पडटली. गोंयच्यो पयल्यो उत्तर जिल्लो पंचायत अध्यक्ष अमोल मोरजकार ह्यो झुजारी शशिकलाताईंच्या विचारांच्यो. गोंयांतल्या इंग्लिश माध्यमाच्या प्राथमीक शाळांक अनुदान दिवचें न्हय म्हूण आंदोलन जालें तेन्ना त्यो रस्तो आडावंक समेस्तां वांगडा बशिल्ल्यो.
मुख्यमंत्री शशिकलाताईंची म्हजी पयली वळख निबंध सर्तीचे बक्षीस तांच्या हातांतल्यान घेतना जाली. गोंयचे भाग्यविधाते भाऊसाहेब बांदोडकार हांचे विशीं बरयल्ल्या निबंधाक तीन फावटी इनामां मेळ्ळीं, तालुको ते राज्य पावंड्यार. वर्सभर एकाच निबंधाक इनामां मेळोवपी कोण ही उमळशीक ताईंच्या दोळ्यांत दिसताली.
विद्यार्थी आसत सावन तांचें म्हजें अदीं मदीं मेळप, हांसप जातालें कार्यावळींनी. राज्य महिला आयोग विधेयक भासाभाशेक येवचे आदीं जाल्ले एके बसकेत तांचे कडेन पत्रकार म्हूण उलोवपाची संद मेळ्ळी. महिला आयोग पयलें खासगी विधेयक विधानसभेंतल्यान फाटीं घेवन सरकारी विधेयकाची मागणी करपाक तांणी तेंको दिलो.
विधानसभेंत अपक्ष आमदार म्हूण शशिकलाताई मुळाव्या शाळांच्या माध्यमाच्या प्रश्नाचेर झांशीची राणी जावन झुजपी. तेन्नाचे मुखेलमंत्री प्रतापसिंह राणे हांकां ‘रावजीसुता खंय गेलो धर्म तुमचो?’ असो प्रस्न विचारपी ताई कश्यो विसरूं येत? आपल्या बापायच्या संस्कारांतल्यान त्यो घडिल्ल्यो. गोंय मुक्तीचें झुज ताईंनी पळयल्लें.
मुक्ती उपरांतचे गोंयचे पयले मुख्यमंत्री जावपी दयानंद बाळकृष्ण बांदोडकार हांची धूव शशिकलाताई. केन्ना केन्ना बापाय विशीं उलयतना यादींनी शेण्टाल्यो. भाऊन म्हाका पुस्तकां वाचपाक शिकयलें. भाऊ म्हाका पुस्तकां हाडून दिताले, तीं वाचपाक, भासाभास करपाक वेळय तांणी दिलो. ते मुख्यमंत्री आसतना आल्तिनातल्या आमच्या घरांत देश पावंड्यावेले फुडारी येताले तेन्ना तांची वळख म्हाका जाली. चूक जाल्यार भाऊंची शिक्षा करपाची पद्दतय वेगळी कशी ही म्हायती ताईन दिल्ली. भासाभाशे वेळार हांवें आसपाक जायना हाची जतनाय भाऊ घेताले ती याद ताईन सांगिल्ली. भाऊंच्या मंत्रीमंडळांत राज्यमंत्री म्हणून सोपूत घेतलो तो आमदार म्हणून वेंचून येवन. भाऊ कमी शिकिल्ले तरी म्हाका उच्च शिक्षण घेवंक गोंयां भायर धाडलें अशें अभिमानान सांगपी ताई भाऊंच्यो उत्तराधिकारी म्हणून गोंयच्यो पयल्यो अस्तुरी मुख्यमंत्री जाल्यो.
मुलाखत, लेख भावल्यार फोन करपी ताई एक बरी उद्येगपती, भंया विणें तांणी खण वेवसायिकांच्यो अडचणी केंद्रा मुखार, राज्य सरकारा मुखार मांडल्यो. बापायचीं सपनां पुराय करतना तांचें सरकार पडलें तरी निमण्या कांय वर्सांनी लेगीत समेस्तांत वचपाक, बसपाक त्यो अनमनल्यो नात.
भारतरत्न अटलबिहारी वाजपेयी हांचें भाशण आपणें खेळां अधिकारिणी ग्रावंडा लागसल्ले कचेरेंतल्यान आयकलें अशें मेकळेपणान सांगपी ताई. ताईंचे तीन पूत यतीन, समीर, अभय वेगळ्या विचारांचे. तांचे बुद्धिमतेक सारें, उदक घालून तांकां घडोवपी, पुतांक राजकारणापासून पयस दवरपी ताई समाज, समाजकारणाक आपले परीन बळगें दिवपी.
मुख्यमंत्री आशिल्ल्यो तेन्ना ताईंचेर बस लॉबीचें सरकार, मायनिंग लॉबीक सांबाळटा, गोंयां भायले शिक्षक हाडटा म्हूण आरोप जाले. आरोपांक जाप दिवपी ताई आदले मुख्यमंत्री मनोहर पर्रीकार हांचोय आदर्श. मराठीमोगी आसत तरी उलोवपाची भास कोंकणीच, आमीय घरा, भायरय कोंकणी उलयतात ही ताईंची गवाय उलयतना मेळटाली.
अर्थिक विकास म्हामंडळ – इडीसी, गोवा माध्यमिक आनी उच्च माध्यमिक मंडळ (गोवा बोर्ड) जल्माक घालपी ताई फकत गोंय, गोंयकारांच्यो न्हय भारताच्यो. तांच्या तेंपार जाल्ल्या कायद्यांनी आतांचे प्रस्न सुटावे करपाची जाप आसतली. तांचें यादस्तिक उबारप, तांचें नांव सरकारी प्रकल्पाक दिवप सरकार अंदू करतलें अशी आस्त बाळगुया.
ताई म्हणल्यार भयण, ल्हान, व्हडांची सगल्यांची. तिच्याय वांट्याक बरे वायट खीण आयले पूण ती बागवली ना, झुजली. तेंच झूज फुडारांत राजकारणांत येवपी अस्तुरेचें, ती मुख्यमंत्री जावपाचें.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
