भांगरभूंय | प्रतिनिधी
इराणाच्या वीज प्रकल्पा वयले हल्ले स्थगीत
झूज सोंपोवचे खातीर सकारात्मक चर्चा सुरू
घोशणे उपरांत तत्काळ देंवलें तेल, गॅसाचें मोल
खबरां संस्था
वॉशिंगटन/तेहरान : मध्यपूर्वेंतले झुजाचे परिस्थितींत मात्शी थाकाय दिवपी गजाल मुखार आयल्या. अमेरिकेचे राष्ट्राध्यक्ष डोनाल्ड ट्रम्प हांणी इराणाच्या वीज प्रकल्पांचेर नियोजीत हल्ले तात्पुरते स्थिगीत केल्ल्याची घोशणा केल्या. झूज सोंपोवचे खातीर सुरू जाल्ले सकारात्मक चर्चेक लागून हो निर्णय घेतिल्ल्याचें तांणी सांगलें. इराण चर्चे खातीर इत्सूक आसा, ताका तत्काळ करार जाय. पांच दिसांनी वा ताचे परस उण्या काळांत करार जावपाक शकता, असोय तांणी दावो केला
ट्रम्प हांणी म्हणलां, अमेरिका आनी इराण हांचे मदीं पुराय आनी निमाणी दुस्मानकाय सोंपोवपा संबंदांत चर्चा जाल्या. तातूंत सकारात्मक संकेत मेळ्ळ्यात. हे घोशणे उपरांत संवसारीक बाजारांत तत्काळ परिणाम दिसून आयलो. तेल आनी गॅसाचें मोल देंविल्ल्याचें नोंद जालें.
हे आदीं शेनवारा रातीं ट्रम्प आनी इराणाक स्ट्रेट ऑफ होर्मुझ परतून उक्तो करचे खातीर 48 वरांची मुजत दिल्ली. ना जाल्यार इराणाचे वीज प्रकल्प पुराय नश्ट करपाचीय शिटकावणी तांणी दिल्ली. मात सध्या तांणी मवाळ सूर लावन हल्ले फुडें धुकल्ल्यात.
ट्रम्प हांणी सांगलें, अमेरिकेचे प्रतिनिधी स्टीव्ह विटकॉफ आनी जेरेड कुशनर हांणी आदल्या रातीं इराणी अधिकाऱ्यां कडेन चर्चा केल्ली, मात इराणान दावो केल्लो, तांणी ट्रम्प हांचे कडेन कसलीच चर्चा करूंक नाशिल्ली. इराणाच्या विदेश मंत्रालयान म्हणलां, उर्जेचें मोल उणें करचे खातीर ट्रम्प अशीं विधानां करता.
मजगतीं, इराणांतले एके खबरां संस्थेन नांव सांगचें न्हय हे अटीचेर दिल्ले म्हायती प्रमाण, तेहरान आनी ट्रम्प हांचे मदीं कसलीच उपचारीक चर्चा जावंक ना, असो दावो केला. ताका लागून ह्या घडामोडींचेर अजून लेगीत अनिश्चितायेचें कूप आसा.
हेच फाटभुंयेर ब्रिटनाचे प्रधानमंत्री कीर स्टार्मर आनी डोनाल्ड ट्रम्प हांचे मदीं आयतारां उसरां फोनाचेर चर्चा जाली. संवसारीक दर्या येरादारी परतून सुरळीत करचे खातीर स्ट्रेट ऑफ होर्मुझ मार्ग उक्तो करप गरजेचें आसा, हें दोनूय फुडाऱ्यांनी मान्य केलें.
मजगतीं, इझ्रायलाच्या संरक्षण दळान इराण आनी लेबनानांतल्या हिझबुल्लाहा आड आनीक कांय सप्तकां झूज चालूच उरपाची शक्यताय उक्तायल्या. ताका लागून एके वटेन संवादाची प्रक्रिया चालू आसतना, दुसरे वटेन संघर्श कायम उरपाचीं चिन्नां दिसतात.
इराणाच्यो तीन नव्यो अटी
इराणान झूजबंदी खातीर तीन नव्यो अटी दवरल्यात. पयली, ह्या प्रदेशांतले अमेरिकेचे सैन्य तळ बंद करपाक जाय. दुसरी, स्ट्रेट ऑफ होर्मुझ खातीर नवे नेम स्थापन करपाक जाय आनी तिसरी अट, इराण विरोधी मानतात त्या माध्यम प्रतिनिधींचेर खटलो चलोवन तांचें प्रत्यार्पण करपाक जाय. हाचे आदीं इराणान म्हणिल्लें, फुडारांत झूज जावचें ना हाची हमी, जाल्ल्या लुकसाणेची भरपाय आनी पुराय प्रदेशांत चालू आशिल्लो संघर्श सोंपोवप, ह्या अटींचेर झूजबंदी जातली. इराणी अधिकाऱ्यान सांगलें, जे मेरेन तांच्या दुस्मानांक धडो शिकयनात ते मेरेन तांचो देश आपल्यो कारवायो चालूच दवरतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
