भांगरभूंय | प्रतिनिधी
आतां मेरेन जाल्ल्या वेव्हारांची चवकशी करपाची हमी
भांगरभूंय । प्रतिनिधी
पणजीः सरकारान झुआरी अॅग्रो कॅमिकल कंपनीक दिल्ली जमीन तांणी कशी विकली, हाची चवकशी करपा सयत हे मुखार ते कंपनीक संबंदीत जमनीर प्लॉट करून विकपाक दिवचे ना, अशी हमी मुख्यमंत्री डॉ. प्रमोद सावंत हांणी शुक्रारा विधानसभा सभाघरांत दिली.
आमदार विजय सरदेसाय हांणी शुक्रारा प्रस्न जापेच्या वराक झुआरी अॅग्रो कॅमिकल कंपनीक सांकवाळे दिल्ले जमनीचो प्रस्न उपस्थीत केलो. ताचे वयल्यान आमदार सरदेसाय हांणी सरकाराचेर आरोप केले. गोंयचे पयले मुख्यमंत्री भाऊसायब बांदोडकार हांणी उद्देगीक वसणूक स्थापन करून गोंयकारांक चडांत चड रोजगार उपलब्ध करून दिवपाचे नदरेन झुआरी अॅग्रो कॅमिकल कंपनीक कोमुनिदादीची 540 हॅक्टर जमीन दिल्ली. पूण आतां ते कंपनीन ते जमनीर प्लॉट तयार करू ते फ्लॅट बांदपा खातीर विकपाक सुरवात केल्या. हे प्लॉट घेवपी चडशे गोंया भायले आसात. कंपनी कडल्यान तांकां दरेक चौखण मिटर 55 हजार रुपया ह्या दरान हे प्लॉट विकतात. ताका लागून गोंयकारांचेर अन्याय जाता. भाऊसायबान ही जमीन ज्या कारणा खातीर दिल्ली, त्या कारणा खातीर कंपनी कडल्यान वापरिनात, असो दावो आमदार सरदेसाय हांणी केलो.
झुआरी अॅग्रो कॅमिकल कंपनीन फुडल्या काळांत ह्या पुराय जमनीर प्लॉट तयार करून ते विकपाचें थारायलें जाल्यार राज्य सरकाराची भुमिका कितें आसतली, असोय प्रस्न आमदार सरदेसाय हांणी उपस्थीत केलो.
मजगतीं, आमदार सरदेसाय हांच्या प्रस्नाचेर उलयतना, भाऊसायब बांदोडकार हांणी कोमुनिदादीची 10,320 चौखण मिटर जमीन झुआरी अॅग्रो कॅमिकल कंपनीक दिल्ली. सध्या ही जमीन तांचेच कडेन आशिल्ल्याचें स्पश्ट केलें.
मजगतीं, कांय म्हयन्यां आदीं झुआरी अॅग्रो कॅमिकल कंपनीक दिल्ले जमनीर राबितो प्रकल्प उबे रावतात, ह्या मुद्द्या वयल्यान विरोधी आमदारांनी राज्य सरकाराचेर हल्लो केल्लो. राज्य सरकार थळाव्यां परस बिगर गोंयकार उद्देजकांक अदीक फाटबळ दिता, असो आरोप विरोधांतल्या कांय आमदारांनी केल्लो. अखेर आमदार विजय सरदेसाय हांणी शुक्रारा हो विशय सभाघरांत हाडून मुख्यमंत्री डॉ. सावंत हांचे कडल्यान ताचेर जाप मेळोवन घेतली.
घोटाळ्याची चवकशी जावपाकूच जायः विजय सरदेसाय
भाऊसायब बांदोडकार हांणी उद्देगीक कारणा खातीर दिल्ली जमीन झुआरी अॅग्रो कॅमिकल कंपनीन राबितो प्रकल्पां खातीर वापरपाचें थारावन 50 हजार कोटींचो घोटाळो केला. ह्या घोटाळ्याची चवकशी जावपाकूच जाय, अशी मागणी आमदार विजय सरदेसाय हांणी सभाघरांत लावन धरली. ताचेर झुआरी अॅग्रो कॅमिकल कंपनीन राबितो प्रकल्पा खातीर घेतिल्ले जमनी विशीं चवकशी करपाचें तशेंच हे मुखार अशी जमीन अश्या प्रकल्पां खातीर दिवची न्हय अशे निर्देश कंपनीक दिवपाची हमी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
