भांगरभूंय | प्रतिनिधी
वास्को : झुआरीनगर-सांकवाळे शेनवारा सांजेवेळार जाल्ल्या दुचाकी अपघातांत बिट्स पिलानीचो विद्यार्थी करण नृसिंहा मुर्ती (२५) हाका मरण आयलें. जाल्यार दुचाकी फाटल्यान बशिल्लो सोहन अधिकारी (२६) हो जखमी जाला. ताका उपचारा खातीर गोमेकॉंत दाखल केला.
पुलिसांनी दिल्ले म्हायती प्रमाण, करण आनी सोहन हे दोगूय बिट्स पिलानींत जीवशास्त्र विभागांत पीएचडीचें शिक्षण घेतात. ते दोगूय शेनवारा सांजेवेळार दुचाकींतल्यान वताले. ह्या वेळार करण दुचाकी चलयतालो. बिट्स पिलानी पसून कांय अंतराचेर आशिल्ल्या झुआरीनगर-सांकवाळेच्या झुआरी इंडियन ऑयल टँकींग लिमेटेडच्या प्रवेशदारा सामकार पावतांच दुचाकीचो धपको तांच्या मुखारच्यान वचपी एका ट्रकाक बसलो. हो धपको ट्रकाच्या फाटल्या टायराक बशिल्ल्यान ते दोगूय रस्त्यार पडले. अपघातांत गंभीर जखमी जाल्ल्या करणाक जाग्यारूच मरण आयलें.
करण हो मुळचो म्हैसूर कर्नाटकचा. जाल्यार जखमी जाल्लो सोहन फोंड्यां रावता. अपघाताचो वेर्णा पुलिसांनी पंचनामो करून कूड दक्षीण गोंय जिल्लो हॉस्पिटलांत धाडली. अपघाता विशीं वेर्णा पुलीस निरीक्षक आनंद शिरोडकार फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
