झुआरीनगर, सांकवाळेच्या बिर्ला वाठारांतल्या कावलां अड्ड्याक उजो
भांगरभूंय | प्रतिनिधी
मुरगांव : झुआरीनगर, सांकवाळेच्या बिर्ला वाठारांतल्या एका व्हड कावलां अड्ड्याक आयज बुधवारा, १९ नोव्हेंबराक सकाळीं सुमार ४.४७ वरांचेर उजो लागलो. ह्या उज्यांत भंगारअड्डो पुरायेन लासून गोबोर जालो. ह्या उज्याची तिव्रताय बरीच खर आशिल्ल्यान ह्या वाठारांतल्या लोकां मदीं भंय पातळिल्लो. हातूंत कोणाक कांय जावंक ना.
हे घडणुकेची म्हायती मेळटांच, वास्को उजो पालोवपी दळ रोखडेंच घडणुके सुवातेर पावलें. मात उज्याक बरोच नेट आशिल्ल्यान तांणी मजगती खातीर मडगांव, वेर्णा आनी हेर सुवातां वेल्यान उजो पालोवपी दळाक आपयले. तशेंच पणजेच्या उजो पालोवपी दळानूय मजत केली.
उजो पालोवपी दळाचे जवान हो उजो पालोवपाक बरेच यत्न केले. ह्या जवानांच्या यत्नांक लागून उजो कुशीकच्या उद्देगीक वसणुकेंतल्या युनिट्सा कडेन पातळपा पसून वाटवली. ह्या वाठारांत ४-५ ल्हान-व्हड कांवलां अड्डे आसात. ते सगले लासून गेले. उजो पालोवपी दळान वेळार प्रतिसाद दिवंक नाशिल्लो जाल्यार भिरांकूळ घडणूक घडपाची. लुकसाणेचो नेमको आंकडो तपासणे उपरांत स्पश्ट जातलो. उजो नेमको कित्याक लागलो हाचो सोद घेवप चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
