भांगरभूंय | प्रतिनिधी
वास्को: बिर्ला झुआरीनगरांत खणपाचें काम सुरू आसतना योग्य ती खबरदारी घेवंक नाशिल्ल्यान भुंयगत गॅस वाहिनीचें लुकसाण जावन गॅस गळटीक सुरू जाली. आशिकुशीचे दुकानदार, रहिवाशां मदीं भिरांत पातळ्ळी. मजगतीं, ह्या प्रकरणांत पुलिसांनी ताकतिकेन रस्त्या वेलीं दोनूय वटानचीं येरादारी बंद केली, तशेंच लोकांक घडणूक थळार वचपा पसून आडायले. मजगतीं, संबंदीत कंपनीन गॅस व्हांवन व्हरपाचें काम बंद केलें. ह्या प्रकराक लागून विवीध प्रकारच्यो प्रतिक्रिया उक्तायताले.
हाचे पयलींय भुंयगत गॅस वाहिनीक लुकसाण जावन गॅसगळटी जावपाचे प्रकार घडल्यात. ज्या वाठारांतल्यान विवीध प्रकारच्यो भुंयगत वाहिन्यो गेल्यात थंय खणपाचें काम करतना योग्य ती खबरदारी घेवपाची गरज आसता. पूण हे गजाली कडेन आडनद करीत आशिल्ल्याचें दिसून येता.
बिर्ला झुआरीनगरांत कंत्राटदारा वतीन खणपाचें काम सुरू आसा. हें काम सुरू आसतना सांजवेळा पावणेपांच वरांच्या सुमाराक थंयच्या भुंयगत गॅस वाहिनीक लुकसाण जालें. ताका लागून गॅस गळटी सुरू जाली. गॅस गळटीक लागून आशिकुशीचे दुकानदार, रहिवाशी हांची धांवपळ जाली. तांकां कितें करचें हेंच कळना जालें. थंय गॅस गळटी जाल्ल्याचें कळटकूच संबंदीत कंपनीचे अधिकारी आनी हेर तशेंच नौदळाचे कांय जाण थंय पावले.
ह्या वेळार पुलिसांक म्हायती मेळटकूच तांणी झुआरीनगरांतल्यान जावपी येरादारी बंद केली. तशेंच लोकांक मोबायलाचेर व्हिडियो शुटींग करचें न्हय हे खातीर संबंदितांक थंय सावन धांवडावन घालपाक सुरवात केली. मोबायलाचो वापर केल्यार वातावरणांत पातळिल्ल्या गॅसान पेट घेवपाची शक्यताय आशिल्ली. ताका लागून ही खबरदारी घेतिल्ली.
उजो पालोवपी दळाक म्हायती मेळटकच ते घडणूक थळार पावले. कंपनीच्या अधिकाऱ्यांनी घडणूक थळार काम सुरू केलें. तांणी गॅस वाहिनींतल्यान गॅस व्हांवन व्हरपाचें बंद केलें. तांणी परिस्थितीचेर नियंत्रण दवरलें ताका लागून रहिवाशांनी सूंऽऽ केलें.
ज्या वाठारांतल्यान भुंयगत वीज, उदक, गॅस वाहिन्यो आसात थंय सुचोवणी दिवपी तक्टे आसतात. ताका लागून खणपाचें काम करतना खबरदारी घेवन काम करचें पडटा. थंय खणपाचें काम सुरू आसतना संबंदीत कंपनीच्या अधिकाऱ्यांक म्हायती दिवपाची गरज आसता. ते सुवाते वेलो भुंयगत वाहिन्यां संबंदीचो आराखडो घेवपाची गरज आसता.
पूण हे सगले गजाली कडेन आडनदर करतात. हाचे पयलींय वास्को शार, वाडें, दाबोळी तशेंच हेर वाठारांतूय कांय घडणुको घडिल्ल्यो. तातूंतल्यान कोणेच बोध घेतिल्ल्याचें दिसून येना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
