भांगरभूंय | प्रतिनिधी
कावलांतल्यो तीन गाडयो लासल्यो
भांगरभूंय । प्रतिनिधी
वास्कोः बिर्ला झुआरीनगरांत सोमारा दनपारां कोयराक उजो लागिल्ल्यान कुशीक आशिल्ल्यो तीन नादुरुस्त गाडयांक उजो लागलो. एका दुकानांतल्यान कांय टायरांक उजो लागलो. उजो पालोवपी दळाच्या जवानांनी रोखड्या रोखडो उजो पालयिल्ल्यान तो हेर कडेन पातळुपाक शकलो ना. ताका लागून थंयचीं कांय दुकानां बऱ्यान वाटावलीं. ह्या उज्याक लागून सुमार देड ते दोन लाख रुपयांचें लुकसाण जाल्ल्याचो अदमास आसा.
उजो लागिल्ले सुवातेर व्हड प्रमाणांत कोयर उडयतात. तो कोयर संबंदीत यंत्रणेन काडपाक जाय, अशें उजो पालोवपी दळाचे दिलीप बिचोलकार हांणी सांगलें.
दनपारां 2.30 वरांच्या सुमाराक बिर्ला झुआरीनगरांतल्या गाडयांक उडो लागिल्ल्याची म्हायती उजो पालोवपी दळाक मेळ्ळी. थंय उदकाचे बंब रोखड्या रोखडे पावले. थंयच्या कोयराक लागिल्लो उजो पातळत गेल्ल्यान थंय आशिल्या तीन गाडयांक तो लागला, हें जवानांक दिसलें. तांणी उजो पालयलो, पूण तो मेरेन ती लासून गेल्लीं. थंय पंक्चर काडपाचें, टायरांनी फूंक मारपाचें दुकान आसा. थंय भायर दवरिल्ल्या कांय टायरांनी पेट घेतलो. तोवूय उजो जवानांनी पालयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
