भांगरभूंय | प्रतिनिधी
भोंवतणचे 20 – 22 कावला अड्डे वाटावपाक जवानांक येस
भांगरभूंय । प्रतिनिधी
वास्को : झुआरीनगर, सांकवाळचे कावलां अड्डे 12 दिसांत दुसरे खेपे उज्याचे भकीक पडले. मात उजो पालोवपी दळाचे तत्परतेक लागून भोंवतणचे सुमार 20- ते 22 कावलां अड्डे उज्या पासून वाटावपाक येस आयलें.
मुळावे म्हायती प्रमाण आयतारा 30 नोव्हेंबराक फांतोडेर 2 वरांच्या सुमाराक झुआरीनगर वाठारांत आशिल्ल्या कावला अड्ड्याक उजो लागिल्ल्याची म्हायती वास्को उजो पालोवपी दळाक मेळ्ळी. उज्यान चडूच पेट घेतिल्ल्याचें कळटाच वेर्णे, मडगांव, फोंडें, पणजी, एमपीटी आनी शिपयार्डाच्या उजो पालोवपी बंबांक आपयले. ते उपरांत असिस्टंट डिविजनल ऑफिसर श्रीपाद गांवस हांच्या मार्गदर्शना खाला उज्याचेर नियंत्रण मेळोवपाक येस आयलें. मजगतीं जेसीबी हाडून लाशिल्लें सामान कुशीक काडलें.
झुआरीनगरांतल्या ह्या वाठारांत 20 ते 22 कावलां अड्डे आसात. तातूंतल्या एकल्याक उजो लागिल्लो. हेर कावलां अड्डे सुरक्षीत आसा. 19 नोव्हेंबराक लेगीत असोच प्रकार घडिल्लो. त्या वेळार लेगीत उजो पालोवपी दळान तत्परता दाखोवन उज्याचेर नियंत्रण मेळयिल्लें आनी कोट्यांनी रुपयांचे मालमत्तेचो गोबर जावपा पसून वाटायल्ले.
उजो कसो लागलो हाचें नेमके कारण कळूंक ना. ह्या कावला अड्ड्याक वीज जोडणी नाशिल्ली. ताका लागून कोणेतरी ह्या कावला अड्ड्याक उजो घातिल्ल्याचो दुबाव कावला अड्ड्याच्या धनयान उक्तायला. ह्या कावला अड्ड्याक परवानो आशिल्लो काय ना, तें स्पश्ट जावंक ना. ह्या प्रकरणांत थळाव्या प्रशासनान संबंदिताचे परवाने तपासपाची गरज आसा. तशेंच अवैध कावलां अड्ड्यां आड कारवाय करचे खातीर पावलां उखलपाची गरज आसा, अशी प्रतिक्रिया ह्या वाठारांतल्या लोकांनी उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
