झुआरीनगरांतलीं अतिक्रमणां काडात

भांगरभूंय | प्रतिनिधी

विद्यानगरांतल्या लोकांनी काडलो मोर्चो

भांगरभूंय । प्रतिनिधी

वास्को : झउआरीनगरांतल्या एमईएस म्हाविद्यालया कडेन वचपी रस्त्याचेर व्हड प्रमाणार जाल्लीं अतिक्रमणां काडचीं आनी रस्तो आदले वरीं करचो, हे मागणे खातीर आयतारा विद्यानगर रहिवासी संघटणेन आयतारा मोर्चो काडलो. मोर्चांत वांटो घेतिल्ल्यांनी अतिक्रमणां आड वेगवेगळ्यो घोशणा दिल्यो. थंयचो रस्तो आदल्या रुपांत हाडचे खातीर सांकवाळ पंचायतीन संबंदितां आड कारवाय करची, अशी मागणी केली.

विद्यानगर झुआरीनगरांत दिसान दीस वस्ती वाडत आसा. थंयच्या वाठारांत व्हड व्हड घर प्रकल्प उबे रावतात, ताका लागून थंय गाडयांची येरादारी लेगीत व्हड प्रमाणांत वाडल्या. थंय रस्त्या कुशीक आशिल्ल्या दुकानकारांनी तशेंच कांय घर धनयांनी अतिक्रमणां केल्ल्यान रस्तो अशीर जाला. ह्या प्रकरणाची दखल घेवन सांकवाळ पंचायतीन संबंदितांक तीं अतिक्रमणां काडचे कातीर नोटिसो दिल्लो. तरी लेगीत तीं अतिक्रमणां अजून थंयच आसात. ते खातीर बेजारिल्ल्या थळाव्या लोकांनी  आयतारा 20 एप्रीलाक मोर्चो काडून संबंदितांचें लक्ष ओडपाचो यत्न केलो.

ह्या मोर्चांत व्हड संख्येन थळाव्या लोकांनी वांटो घेतिल्लो. मोर्चाचें रुपांतर सभेंत जाले उपरांत थंय कांय जाणांनी आपले विचार मांडले. तीं अतिक्रमणां काडपाकूच जाय, अशी तांणी मागणी केली.

संघटणेचे अध्यक्ष सागर तोरस्कार हांणी रस्त्या कुशीक आशिल्ल्या दुकानकारांनी रस्त्याचे कुशीक सिमेंट काँक्रीट घालून अतिक्रमण करून थंय म्हाल दवरपाक सुरवात केल्या, असो दावो केलो. ताका लागून रस्तो अशीर जाला. तातूंत व्हड घर प्रकल्पा कडेन वेगवेगळे टँकर येतात, ताका लागून थंयच्या लोकांक, विद्यार्थ्यांक तशेंच दुचाकी चालकांक जीव मुठींत घेवन फुडें वच्चें पडटा. खरें म्हणल्यार त्या टँकरां खातीर दुसरे कडल्यान दोन रस्ते आसात. पूण टँकर चालक त्या रस्त्यांचो वापर करिनासतना एमईएस म्हाविद्यालया लागसारच्या रस्त्याचो वापर करतात, अशी तांणी म्हायती दिली. पंचायतीन ह्या प्रकरणाची दखल घेवन त्या दुकानकारां आड कारवाय करपाची गरज आसा. आमी हे गजाली खातीर सर्वेअराक आपयल्लो, पूण त्या कार्यालयांतल्यान कोणूच येवंक ना. ताका लागून अश्या अधिकाऱ्या आड कारवाय जावपाची गरज आसा. हो रस्तो आदीं 10 मिटर रुंद आसलो, आतां तो साडे स मिटर जाला, अशें तोरस्कार हांणी सांगलें.