भांगरभूंय | प्रतिनिधी
नवी दिल्ली, खबरां संस्था ः झी आनी सोनी मदली विलीनीकरण कबलात रद्द जाल्या. आतां झी एंटरटेनमेंट सोनीचेर कायदेशीर कारवाय करपाचो विचार करतात. झी एंटरटेनमेंटान 17 डिसेंबर 2023 दिसा कंत्राट पुराय करपा खातीर आनीक कांय दीस दिवचे अशी मागणी केल्ली. झी हांणी सांगलें, कंपनी आपले कडेन उपलब्ध आशिल्ल्या सगळ्या पर्यायांचें मुल्यांकन करता आनी मंडळा कडल्यान निर्देश मेळ्ळ्या उपरांत भागधारकांच्या हितां खातीर गरजेचीं पावलां उबारतली. ताचे खाला आतां योग्य कायदेशीर कारवाय जातली आनी सोनी आनी बीईपीएल हांच्या दाव्यांकय लवाद कारवायेत विरोध करतले.
कितलेशेच फावटीं उलोवणी जालीं तरी दोनूय वटांनी प्रलंबीत अटींचेर एकमत जावंक शकलें ना. ह्या अटीं खातीर दोनूय कंपनींचो फुडाकार गरजेचो आशिल्लो. कंपनीचे एमडी आनी सीईओ पुनीत गोएंका विलीनीकरणाच्या हितां खातीर राजिनामो दिवपाक तयार आसात आनी ते खातीर प्रस्तावाचेरूय चर्चा जाली अशें झी कंपनीन सांगलें.
विलीनीकरणा संबंदीं आपले वटेन पुराय वचनबद्धताय दाखयल्या आनी जायतीं गरजेचीं पावलां उबारल्यांत, जाका लागून आतां कंपनीचो वेळ आनी पयशे खर्च जावपाक लागल्यात अशें ‘झी’ न सांगलें. कंपनीच्या म्हणण्या प्रमाण ‘अशें आसून लेगीत कंपनी वाड जावपाच्यो वेगवेगळ्यो संदी सोदतली.’ सोनीन झी कडेन विलीनीकरणाची येवजण रद्द करपाचें थारायलां.
दोन वर्सां आदीं विलीनीकरणाची घोशणा जाल्ली. पूण अटींचेर कबलात जावंक नाशिल्ल्यान ती मुखार वचूंक ना. ही कबलात रद्द केल्या उपरांत झी कंपनीन सोनी कडल्यान 90 दशलक्ष डॉलराची मागणी केल्या. करारा प्रमाण विलीनीकरणाची येवजण 21 डिसेंबर 2023 मेरेन पुराय जावपाची आशिल्ली. हाचे भायर नियामक आनी हेर मंजुरी खातीरय 1 म्हयनो अतिरिक्त वेळ दिल्लो.
बिझनेस टुडेच्या म्हणण्या प्रमाण, सोमारा सकाळीं 22 जानेवारी 2024 दिसा जपानाच्या सोनी गटान झी कडेन केल्लो 10 अब्ज डॉलर विलीनीकरण करार संपुष्टात हाडपाची घोशणा केली आनी अधिकृतपणान झी एंटरटेनमेंटाक समाप्त करपाचें पत्र धाडलें. झी हांणी ही म्हायती मार्केट रेग्युलेटरा कडेन शेअर केली. झीचे एमडी पुनीत गोएंका हांणी ही कबलात मोडली अशी म्हायती आपल्या ‘एक्स’ सोशल मिडिया वयल्या पोस्टा वरवीं दिली. आपणाक संदेश आयलो ज्या कराराची हांवें दोन वर्सा कल्पना केली आनी ताचेर काम केल्ले तो करार रद्द जाला. ही कबलात घडोवपा खातीर हांवें म्हजे प्रामाणीक यत्न केल्ले, पूण अशें आसून लेगीत ती येसस्वी जावंक शकली ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
