झिम्बाब्वे पात्रतायेच्या लागसार

भांगरभूंय | प्रतिनिधी

झिम्बाब्वे पंगडान संवसारीक वन डे क्रिकेट सर्तीचे पात्रताय फेरयेंतली आपली जैताची धांव चालूच दवरल्या. काल बिरेस्तार जाल्ले सुपर सिक्सांतलें आपले पयले मॅचींत ताणें ओमान पंगडाक 14 धांवड्यांनी हारयलो.

37 वर्सां पिरायेच्या सीन विलियम्सान आनीक एका शेंकड्याची खेळी करून पंगडाच्या जैतांत म्हत्वाचें योगदान दिलें. ताका सिकंदर रझा आनी ल्युक जॉंग्वे हांणी बरी साथ दिली. ओमानान अखेरचे ओव्हरी मेरेन जैत मेळोवपाचो यत्न केलो. ह्या यत्नाक लागून तांचो आत्मविस्वास निश्चीत वाडला आसतलो. मजगतीं, झिम्बाब्वेन सेगीत सातवें जैत जोडलें.

पयलीं बॅटींग करतना झिम्बाब्वेन निर्धारीत ओव्हरींनी 7 विकेटी वगडावन 332 धांवड्यांचो दोंगर उबारलो. जॉयलॉर्ड गुम्ब्ले (21) आनी मुखेली क्रेग एर्व्हिन (25) हांकां व्हड खेळी करपाक जमली ना. पूण, विलियम्सान परतून एकदा उपेगी खेळी केली. ताणें 103 बॉलांनी 142 धांवड्यांची खेळी केली. हातूंत 14 चवक्यांचो आनी तीन सक्यांचो आस्पाव आशिल्लो. सिकंदर हाणें 42 आनी जॉंग्वेन नाबाद 43 धांवड्यांचें योगदान दिलें.

मोखीचो फाटलाव करपी ओमानाक ओपनर कश्यप प्रजापतीन बरी सुरवात करून दिली. ताणें 96 बॉलांनी 12 चवके आनी एक सक्याचे मजतीन 103 धांवड्यो केल्यो. अकिब इलियासान (42) ताका बरी साथ दिली. आयान खानान 47 धांवड्यो केल्यो. झिशान मकसूद आनी मोहम्मद नदीम हांणी लेगीत आकर्शक बॅटींग केली. रिटायर्ड हर्ट जावन मैदाना भायर गेल्लो मुखेली मकसूद परतून मैदानांत देंवलो आनी आपल्या पंगडाची जैताची आस्त कायम जिवी दवरली.

ओमानान अखेरच्या 12 बॉलांनी 32 धांवड्यांची गरज आशिल्ली. पूण, रिचर्ड नागराव्हान दोन धांवड्यो दिल्यो आनी मॅच 6 बॉलांनी 30 अशी कठीण जाली. अखेरेक ओमानान 9 विकेटी वगडावन 318 धांवड्यो केल्यो आनी झिम्बाब्वेक 14 धांवड्यांनी जैत फावो जालें.

सुपर सिक्स फेरयेंतली ताची ही पयलीच मॅच आशिल्ली आनी पयली मॅच जिखून ताणें आपले वट्ट गूण स केले. झिम्बाब्वेचो आनीक दोन मॅची बाकी आसात. तातूंतली एक जिखली जाल्यार लेगीत ताची संवसारीक सर्तीचे मुख्य फेरयेंतली सुवात निश्चीत जातली. झिम्बाब्वेच्या ह्या जैताचो वॅस्ट इंडिजाक धपको बसला. कारण वॅस्ट इंडिजाची पात्रताय फेरयेंतलें प्रदर्शन बरें जावंक ना. ताका संवसारीक सर्तीचे मुख्य फेरयेंत सुवात मेळोवपाक जाय जाल्यार दुसऱ्या पंगडांच्या निकालांचेर निंबून रावचें पडलां.