भांगरभूंय | प्रतिनिधी
दादल्यांचे आयसीसी संवसारीक टी-20 करंड उप क्षेत्रीय आफ्रिका पात्रताय ब गटांत झिम्बाब्वे पंगडान गाम्बिया आड आंतरराष्ट्रीय टी-20च्या इतिहासांतली सगल्यांत व्हड धांवसंख्या उबारली.
झिम्बाब्वेन पयलीं बॅटींग करून 4 विकेटी व्हगडावन 344 धांवड्यांचो दोंगर उबारलो. फाटल्या कांय वर्सां सावन पंजाब किंग्सा वतीन आयपीएलांत खेळपी सिकंदर रझान 43 बॉलांनी 133 धांवड्यांची खेळी केली.
झिम्बाब्वेन नेपाळाचो विक्रम मोडलो. नेपाळान पोरूं आशियायी खेळां सर्तींत मंगोलिया आड 314 धांवड्यो केल्ल्यो. झिम्बाब्वेन वट्ट 27 सके आनी 30 चवके मारले.
रझान 15 सके मारले. पूण, सगल्यांत चड सके मारपाच्या इस्तोनियाच्या साहील चौहानाचो विक्रम मोडपा पसून चुकलो. चौहानान सायप्रसा आड 18 सके मारिल्ले. तशेंच रझा आंतरराष्ट्रीय टी-20त जलद शेंकडो मारपाचे वळेरेंत दुसरे सुवातेर पावलो. मजगतीं, रझा खेरीत ब्रायन बेनेटान 26 बॉलांनी 50 आनी क्लायव्ह मडांडेन 17 बॉलांनी 53 धांवड्यांची खेळी केली.
आयसीसीन सगल्या एफिलेटीड देशांक आंतरराष्ट्रीय टी-20चो दर्जो दिला. हांगा अशे साबार विक्रम जायत आसतात.
मजगतीं, गाम्बियाचो मुसा जोबारतेह आंतरराष्ट्रीय टी-20त सगल्यांत म्हारगो बॉलर थारलो. ताणें चार ओव्हरींनी 93 धांवड्यो दिल्यो. ताणें श्रीलंकेच्या कसून रजिताचो विक्रम मोडलो. रजितान चार ओव्हरींनी 75 धांवड्यो दिल्ल्यो.
मजगतीं, मोखीचो फाटलाव करपी गाम्बियाचो डाव 14.4 ओव्हरींनी 54 धांवड्यांचेर सोंपलो. ताच्या फकत आंद्रे जर्जूक (12) दोट्टी आंकडो हुपपाक शक्य जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
