भांगरभूंय | प्रतिनिधी
संवसारीक वन डे क्रिकेट सर्तीचे पात्रताय फेरयेंत काल शेनवारा धपको बसपी निकाल पळोवपाक मेळ्ळो. येजमान झिम्बाब्वेन वॅस्ट इंडिज पंगडाक 35 धांवड्यांनी हारयलो.
झिम्बाब्वेन बॉलरांच्या जबरदस्त प्रदर्शना नेटार वॅस्ट इंडिजाक हारोवन सुपर सिक्सांत प्रवेश केलो. झिम्बाब्वेन तिनूय मॅची जिखून अ गटांतली पयली सुवात मेळयली.
झिम्बाब्वेन पयलीं बॅटींग करून 49.5 ओव्हरींनी 268 धांवड्यो केल्यो. सिकंदर रझान 68, रायन बर्लान 50 आनी क्रेग एर्व्हिनान 47 धांवड्यांचें योगदान दिलें. जॉयलॉर्ड गुम्बीए (26) आनी मुखेली एर्व्हिन हांणी पयले विकेटी खातीर 63 धांवड्यांची भागिदारी करून झिम्बाब्वेक बरी सुरवात करून दिल्ली. पूण, मदले फळयेंतल्या बॅट्समनांच्या अपेसाक लागून वॅस्ट इंडिजान मॅचीचेर पकड मेळयली. एर्व्हिनान सीन विलियम्साक (23) वांगडा घेवन डाव सांबाळपाचो यत्न केलो. पूण, हे दोगूय अणभवी बाद जाल्या उपरांत फाटले मॅचींत झिम्बाब्वे वतीन जलद शेंकडो मारपी सिकंदरान परतून एकदा उपेगी खेळी केली. ताणें 58 बॉलांनी पांच चवके आनी दोन सक्यांचे मजतीन 68 धांवड्यो केल्यो. बर्लान 50 धांवड्यो करून बाद जाल्या उपरांत उरिल्ल्या बॅट्समनांक वॅस्ट इंडिजाच्या बॉलरांनी रोखडेच बाद केले. किमो पॉलान सगल्यांत चड तीन विकेटी घेतल्यो.
मोखीचो फाटलाव करपी वॅस्ट इंडिजाक ब्रॅण्डन किंग आनी कायले मेयर्स हांणी बरी सुरवात करून दिली. पूण, किंग 20 धांवड्यांचेर बाद जालो आनी मॅच झिम्बाब्वे वटेन घुंवपाक सुरवात जाली. फाटले मॅचींत शेंकडे मारपी मुखेली शाय होप (30) आनी निकोलस पुरन (34) हांकां मोठी खेळी करपाक जमूंक ना. रोस्टन चेसान 44 धांवड्यो केल्यो. मेयर्स 56 धांवड्यो करून तंबूंत परतलो. झिम्बाब्वेच्या बॉलरांनी उत्कृश्ट बॉलींग घाली. तांणी वॅस्ट इंडिजाचो डाव 44.4 ओव्हरींनी 233 सोंपोवन 35 धांवड्यांनी जैत जोडलें. तेंदाई चतारान सगल्यांत चड 3 विकेटी घेतल्यो. ब्लेसिंग,रिचर्ड आनी सिकंदर हांणी दरेकी 2 विकेटी मेळयल्यो.
नॅदरलॅण्ड सुपर सिक्सांत
नॅदरलॅण्डान लोगन वॅन बिक (4-24) हाचे उत्कृश्ट बॉलिंगे उपरांत मॅक्स ओडावड (90) आक्रमक बॅटिंगे नेटार संवसारीक पात्रताय फेरयेंत नेपाळ पंगडाक 7 विकेटींनी हारोवन सुपर सिक्सांत सुवात मेळयली.
नॅदरलॅण्डान टॉस जिखून पयलीं नेपाळाक बॅटिंग करपाचें आमंत्रण दिलें. नेपाळाक 167 धांवड्यां मेरेन मजल मारप शक्य जालें. नॅदरलॅण्डान 27.1 ओव्हरींनी मोख मेळयली. ओडावडा खेरीत बास डी लीडान नाबाद 41 आनी विक्रमजीत सिंगान 30 धांवड्यांची खेळी केली. वॅस्ट इंडिज आनी झिम्बाब्वे उपरांत सुपर सिक्सांत सुवात मेळोवपी नॅदरलॅण्ड तिसरो पंगड थारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
