भांगरभूंय | प्रतिनिधी
खबरां संस्था
नवी दिल्लीः कांय दिसां आदीं झिम्बाब्वे क्रिकेट पंगडाचो आदलो कॅप्ठन हिथ स्ट्रीक हाका मरण आयिल्ल्याची वावडी पातळल्ली. मात आयतारा ताका खऱ्यानीच मरण आयलें. पिरायेच्या 49व्या वर्सा कॅन्सरात ताचो बळी घेतलो. आयताराक फातोडेर माताबेलँड हांगच्या ताच्या फार्महावसांत ताणे निमणे स्वास घेतलो. झिम्बाब्वेचो आदलो आंतरराष्ट्रीय खेळगडो आनी म्हणयारो जॉन रेनी हाणे तांच्या मरणाची पुश्ठी केल्या.
दोन सप्तकां पयलीं स्ट्रिकाो आदलो सहकारी हेन्नी ओलोंगा हाणे सोशल मीडियाचेर स्ट्रीकाच्या मरणाची खबर दिल्ली. मात ती वावडी आशिल्ली. ते खातीर ओलांगान माफी मागिल्ली. झिम्बाब्वे क्रिकेटींतलें सगल्यांत व्हड नांव आशिल्ल्या स्ट्रीकाचेर 2021 वर्सा आंतरराष्ट्रीय क्रिकेट परिशदेन (आयसीसी) 2018 वर्सा भ्रश्टाचार विरोधी संहितेंचें उल्लंघन केल्ले खातीर आठ वर्सांची बंदी घातिल्ली.
स्ट्रीकान टॅस्टींत 216 आनी वन-डे क्रिकेटींत 239 विकेटी घेतल्यात. आंतरराष्ट्रीय क्रिकेटींतल्यान निवृत्ती घेतल्या उपरांत ताणे झिम्बाब्वे, बांगलादेश पंगडांचे प्रशिक्षक म्हणून काम केल्लें. आयपीएलांत ताणे कोलकाता नायट रायडर्स आनी राजकोट ह्या पंगडांक प्रशिक्षण दिल्लें. टॅस्ट आनी वन-डेंत 100 विकेटी घेवपी तो झिम्बाब्वेचो पयलो क्रिकेटीयर आशिल्लो. 100 टॅस्ट विकेटी आनी 1 हजार धांवड्यो करपी तो झिम्बाब्वेचो पयलो खेळगडो आशिल्लो. वन-डेंत ताच्या नांवार 200 विकेटी आनी 2 हजार धांवड्यो आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
