भांगरभूंय | प्रतिनिधी
खबरां संस्था
मेलबर्नः टी- 20 वर्ल्ड कपांतले सुपर 12तले आपले निमणे मॅचींत भारतान झिम्बाब्वेक 71 धांवड्यांनी हारोवन दिमाखांत उपांत्य फेरयेंत प्रवेश केलो. जाल्यार एडिलेड हांगा पाकिस्तानान बांगलादेशाक हारोवन आपल्यो उपांत्य फेरयेंतलो प्रवेश निश्चीत केलो. विशेश म्हणल्यार नेदरलँडान सुपर 12 फेरयेंत आपल्या निमणे मॅचींत सगल्यांक धपको दिवपी जैताची नोंद केली. तांणी दक्षीण आफ्रिकेक हारोवन तांका सर्तीतल्यान भायर वचपाची वाट दाखयली. ताका लागून झिम्बाब्वे आडचे मॅची पयलींच भारत उपांत्य फेरये खातीर पात्र थारिल्लो. फकत आपल्या गटांत भारत पयले काय दुसरे सुवातेर हें झिम्बाब्वे आडचे मॅचीचेर निंबून आशिल्लें. भारतान आपली पयली सुवात तिगोनव दवोरिल्ल्यान आतां ह्या गटांतल्यान भारत आनी पाकिस्तान उपांत्य फेरये खातीर पात्र थारल्यात. पाकिस्ताना सुपर 12तेल आपले निमाणे मॅचींत बांगलादेशाक 5 विकेटींनी हारयलें. फुडल्या आयतारा घडये भारत आड पाकिस्तान अशी ड्रीम फायनल पळोवपाची संद क्रिकेट मोगींक मेळपाक शकता.
न्यूझिलंड पंगड सगल्यांत पयलीं उपांत्य फेरये खातीर पात्र थारलो. त्या उपरांत इंग्लंडाचो नंबर लागला. पयल्या गटांत न्यूझिलंड पयले आनी इंग्लंड दुसरे सुवातेर आसात. दुसऱ्या गटांतल्यान भारत पयले आनी पाकिस्तान दुसरे सुवातेर आसा. आयसीसीच्या नियोजना प्रमाण एक पंगडांतलो पयले सुवातेर आशिल्लो पंगड दुसऱ्या पंगडांत दुसरे सुवातेर आशिल्ल्या पंगडा कडेन उपांत्य फेरयेंतली मॅच खेळटलो. न्यूझिलंड आनी पाकिस्ताना मदीं पयलीं उपांत्य मॅच 9 नोव्हेंबराक जातली. भारत आनी इंग्लंडा मदीं 10 नोव्हेंबराक अॅडलेडच्या ओव्हल मैदानार उपांत्य मॅच जातली.
कोणाचें दालें जड?
भारत आनी इंग्ंलंडा मजगतीं टी- 20च्यो 22 मॅची जाल्यात. तातूंतले अर्द्या परस चड मॅची भारतान जिखल्यात. इंग्लंड आनी भारता मजगतीं जाल्ल्टी तीन टी-20 वर्ल्ड कप मॅचींतल्यो दोन भारतान जिखल्यात. अंदूच्या वर्ल्ड कपांत भारत आपलें वर्चस्व तिगोवन दवोरतलो काय इंग्लंड भारताक धपको दितलो हें ह्या सप्तकांत स्पश्ट जातलें. न्झूझिलंड आनी पाकिस्तान टी-20 फॉरमेटांत आतां मेरेन 28 मॅची खेळ्ळ्यात. पाकिस्तानान 17 फावट न्यूझिलंडाक हारयलां. ताका लागून पाकिस्तानाचें दालें जड दिसता. आतां मेरेन हे दोनूय पंगड टी-20 वर्ल्ड कपांत स फावट एकमेकां आड खेळ्ळ्यात आनी पाकिस्तानात तातूंतल्यो 4 मॅची जिखल्यात.
उपांत्य मॅचींत भारतान इंग्लंडाक आनी पाकिस्तानान न्यूझिलंडाक हारयल्यार हो दोनूय कट्टर प्रतिस्पर्धी मदीं 13 नोव्हेंबराक मेलबर्नाचेर फायनल जावपाक शकता. हाचे पयलीं 2007 वर्सा भारत- पाकिस्तान अशी फायनल जाल्ली. तेन्ना भारतान निमाण्या बॉलाचेर जैत मेळयल्लें. भारत आनी पाकिस्ताना मजगतीं टी-20 वर्ल्ड कपांत सात मॅची जाल्यात. तातूंतल्यो 6 मॅची भारतान जिखल्यात. पाकिस्तानान पोरूं इंग्लंडांत जाल्ले मॅचींत भारताक हारयल्लें. पाकिस्ताना आडचे सगले टी-20 मॅचींत विराट कोहलीन तुफानी फटकेबाजी केल्या. कोहली केन्नाच पाकिस्ताना आड वर्ल्ड कपांत फेल थारलो ना. ताका लागून ह्या दोनूय पंगडां मदीं फायनल जाल्यार सगल्यांची नदर ताचेर आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
