भांगरभूंय | प्रतिनिधी
झिम्बाब्वेन संवसारीक सर्तीचे पात्रताय फेरयेंतले मॅचींत वन डे क्रिकेटीच्या इतिहासांतलें दुसरें व्हड जैत मेळयलें. ताणें अमेरिकेक 304 धांवड्यांनी हारयलो. ह्या जैता सयत ताणें सुपर सिक्सांतली सुवात निश्चीत केली.
हरारे स्पोर्ट्स क्लब मैदानाचेर झिम्बाब्वेन टॉस जिखून पयलीं बॅटींग करपाचो निर्णय घेतलो आनी निर्धारीत 50 ओव्हरींनी 6 विकेटी वगडावन 408 धांवड्यांचो दोंगर उबारलो. मोठे धांवसंख्येचो फाटलाव करपी अमेरिकेक हें आव्हान पेलूंक ना आनी ताचो डाव 25.1 ओव्हरींनी 104चेर सोंपलो.
झिम्बाब्वेचो मुखेली सीन विलियम्सान 101 बॉलांनी 174 धांवड्यो केल्यो. हातूंत 21 चवके आनी पांच सक्यांचो आस्पाव आशिल्लो.
वन डे क्रिकेटींत झिम्बाब्वेचें हें सगल्यांत व्हड जैत थारलें. जाल्यार आंतरराष्ट्रीय मळा वयलें दुसरें व्हड जैत आसा. व्हडा फरकान जैत जोडपाचो संवसारीक विक्रम भारताच्या नांवार आसा. ताणें 15 जानेवारी 23त 317 धांवड्यांनी जैत जोडिल्लें.
मोखीचो फाटलाव करपी अमेरिकेच्या फकत तिनूच बॅट्समनांक दोट्टी आंकडो हुपपाक जमलो. गजानन सिंगान 13, अभिषेक पराडकरान 24 आनी जेसी सिंगान 21 धांवड्यो केल्यो.
झिम्बाब्वे वतीन रिचर्ड नगरवान दोन, ब्रॅण्ड इवांसान 1, सिकंदर रजान 2, ल्युक जोंग्वेन आनी रायन बर्ल हाणें दरेकी एक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
