भांगरभूंय | प्रतिनिधी
संवसारीक पात्रताय फेरीः स्कॉटलॅण्डा आड 31 धांवड्यांनी हार
हरारेः संवसारीक वन डे क्रिकेट सर्तीचे पात्रताय फेरयेंत सुपर सिक्सांतले सवे मॅचींत झिम्बाब्वेक स्कॉटलॅण्डा आड हार घेवची पडली. हे हारीक लागून वर्साचे अखेरेक भारतांत जावपी संवसारीक सर्तीची पात्रताय मेळोवपाक झिम्बाब्वे अपेशी थारलो. संवसारीक सर्तीक पात्र जावपाक झिम्बाब्वेक कालची मॅच जिखपाक जाय आशिल्ली. पूण, ताका 235 धांवड्यांचो फाटलाव करपाक जमलो ना. स्कॉटलॅण्डान पयलीं बॅटींग करतना 8 विकेटी वगडावन 234 धांवड्यो केल्यो. पूण, झिम्बाब्वेचो डाव 203चेर सोंपलो आनी अशे तरेन ताका 31 धांवड्यांनी हार घेवची पडली.
झिम्बाब्वेन टॉस जिखून पयलीं स्कॉटलॅण्डाक बॅटिंगेचें आमंत्रण दिलें. क्रिस्तोफर मॅकब्रायड आनी मॅथ्यू क्रॉस हांणी पयले विकेटी खातीर 56 धांवड्यांची भागिदारी केली. मॅकब्रायडान 28 धांवड्यो केल्यो. जाल्यार मॅथ्यून 38 धांवड्यांचें योगदान दिलें. ते उपरांत ब्रॅण्डन मक्लेनान 34 आनी मुंसेन 31 धांवड्यांची भर घाली. मिचेल लिस्कान 34 बॉलांनी 48 धांवड्यो करून पंगडाचो स्कोर 200 वयर व्हेलो. अखेरेक मार्क वॅटान नाबाद 21 धांवड्यो करून स्कॉटलॅण्डाचो स्कोर 234चेर पावयलो.
झिम्बाब्वे ही मॅच सहज जिखतलो अशें दिशिल्लें. पूण, ताणें 91 धांवड्यांचेर 5 विकेटी वगडायल्यो. सिकंदर रजान 34 धांवड्यो केल्यो. बुर्लान एक बाजू सांबाळून धरतना पंगडाक जैत मेळोवन दिवपाचो यत्न केलो. अखेरेक तो 84 बॉलांनी 83 धांवड्यो करून बाद जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
