भांगरभूंय | प्रतिनिधी
-गोंयांत अजून मेरेन झिका दुयेंती मेळूंक नात
पणजीः फाटल्या कांय म्हयन्यां सावन गोंयांत डेंग्यूचे दुयेंती वाडत आसात. तेच प्रमाण आतां केंद्र सरकारान महाराष्ट्रांत झिका व्हायरसाचे दुयेंती वाडत आशिल्ल्यान सगल्या राज्यांक सादूरतायेची शिटकावणी जारी केला. पूण गोंयांत अजून झिका संसर्ग जावंक ना अशी म्हायती भलायकी खात्याच्या वरिश्ठ अधिकाऱ्यांनी दिल्या.
केंद्रान जारी केल्ले अधिसुचोवणे प्रमाण सध्या पुणे आनी महाराष्ट्रांतल्या हेर वाठारांनी झिकाचे दुयेंती वाडत आसात. झिकाचो परिणाम गुरवार बायलेच्या गर्भांतल्या भुरग्याक जावं येता. देखून सगळ्या राज्यांनी झिकाची लागण जाल्ल्या गुरवार आवयच्या अर्भकांचे स्क्रिनींग करचे, तांचेर नदर दवरची. लोकां मदीं भंय पातळचो न्हय म्हणून जागृताय करची अशेंय सांगलां.
जळार चाबल्यार हो व्हायरस संसर्ग जाता देखून निवासी वाठारांनी, शाळांनी, बांदकाम सुवातींनी आनी कार्यालयांनी आनी हेर भौशीक सुवातेर जळारांचे प्रजनन जावचें न्हय हे खातीर उपाय येवजण्यो कनच्यो. हे संबंदी भलायकी खातें पयलींच जळारांची पैदास जावची न्हय म्हूण वावुरता. डेंग्यूचेर नियंत्रण दवरपा खातीर जळारांचे प्रजनन आडावपाचे यत्न सुरू आसात. झिका जळारा वरवीं संसर्ग जाता. पूण आमी खासा यत्न करतात, सध्या गोंयांत झिकाचो धोको ना अशी म्हायती भलायकी अधिकाऱ्यांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
