भांगरभूंय | प्रतिनिधी
देवघर, खबरां संस्था: झारखंडांतल्या देवघरांत बस-ट्रका मदीं भिरांकूळ अपघात जालो. ह्या अपघातांत १८ यात्रेकरुंक मरण आयलें. जायते यात्रेकरू जखमी जाल्यात आनी तांची स्थिती गंभीर आसा. गोड्डाचे खासदार निशिकांत दुबे हांणी सोशल मिडियाचेर पोस्ट करून १८ जाणांक मरण आयिल्ल्याची म्हायती दिली.
मंगळारा सकाळीं पांच वरांचेर देवघराच्या मोहनपूर ब्लॉकांतल्या जमुनिया चौका लागसार नवपुरा गांवांत हो अपघात जालो. अशें म्हण्टात जायत्यो कुडी राशी पोंदा आडकून उरल्यात. तांकां काडपाचो यत्न सध्या चल्ला.
हो बस आनी ट्रका मदलो धपको इतलो नेटान आशिल्लो, बसीचो अर्दो भाग पुरायेन चिड्डून गेलो. यात्रेकारांचीं बॅगां आनी सामान बसींत लोंबकळटालें.
हे सगले मरण आयिल्ले लोक बिहारांतल्या गयाजी हांगच्या मासूमगंज हांगचे आशिल्ल्याचें समजलां. ४० यात्रेकरूंनी भरलेली बस देवघरच्यान बासुकीनाथाक वताली. देवघर सावन १८ किमी अंतराचेर मुखारच्यान येवपी सिलेंडरान भरिल्ल्या ट्रकाक बसीचो धपको लागलो.
पुलिसांच्या म्हणण्या प्रमाण, बस चालकाक न्हीद लागिल्ल्यान हो अपघात जालो. धपक्या उपरांत चालक सिटा सयत रस्त्यार पडलो आनी ताका जाग्यारूच मरण आयलें.
अपघाता उपरांत घडणुके सुवातेर बरोच बोवाळ जालो, अशें प्रत्यक्षदर्शींनी सांगलें. थळाव्यांनी जखमी यात्रेकरूंक बसींतल्यान भायर काडले आनी मोहनपूर पुलीस स्टेशनाक म्हायती दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
