भांगरभूंय | प्रतिनिधी
रान मंत्र्यान विधानसभेंत दिल्ले लेखी जापेंतल्यान म्हायती उजवाडाक
भांगरभूंय । प्रतिनिधी
पणजीः गोंयांत 2019- 20 ते 2023- 24 ह्या काळांत रान खात्यान खाजगी व्यक्ती आनी सरकारी खात्यांक मेळून 70 हजार 142 झाडां मारपाक परवानगी दिल्ली. मारिल्ल्या झाडांच्या बदल्यात वट्ट 2 लाख 7 हजार 737 झाडांचे रोपे लावपाक सांगिल्ले. सध्याचे स्थितींत 91 हजार 778 झाडांचे रोपे (44 टक्के) जगल्यात. रान मंत्री विश्वजीत राणे हांणी विधानसभेंत दिल्ले लेखी जापेंतल्यान ही म्हायती मेळ्ळ्या. हे संबंदांत आमदार क्रूझ सिल्वा हांणी अतारांकीत प्रस्न उपस्थीत केल्लो.
जापेंतल्यान मेळिल्ले म्हायती प्रमाण 2019 ते 2023- 24 ह्या काळांत खाजगी व्यक्तींक 51 हजार 12 झाडां मारपाक परवाने दिल्ले. ताच्या बदल्यात तांचे कडल्यान 1 लाख 51 हजार झाडांचे रोपे लावपाची सुचोवणी केल्ली. रान खात्याच्या अधिकाऱ्यांनी घडणुकेचे सुवातेर वचून पळोवणी केली तेन्ना तातूंतलीं 56 हजार 473 झाडांचे रोपे (37.30 टक्के) जिवीत आशिल्ल्याचें दिसलें. वर्साच्या हिशेबान पळयत जाल्यार 2023- 24 त सगळ्यांत चड 11 हजार 695 झाडां मारपाची परवानगी दिल्ली. ताच्या बदल्यात 35 हजार 103 झाडांचे रोपे लावपाक सांगिल्ले. तातूंतले 7,791 रोपे जिवीत आसात.
विवीध सरकारी खात्यांक 2019- 20 ते 2023- 24 ह्या काळांत खाजगी व्यक्तींक 19 हजार 130 झाडां मारपाचे परवाने दिल्ले. ताच्या बदल्यात तांकां 56 हजार 350 झाडांचे रोपे लावपाची सुचोवणी केल्ली. रान खात्याच्या अधिकाऱ्यांनी घडणुकेचे सुवातेर वचून पळोवणी केली तेन्ना तातूंतले 35 हजार 305 रोपे (62.65 टक्के) जिवीत आशिल्ल्याचें दिसले. सरकारी खात्यांक 2021- 22 त सगळ्यांत चड 11 हजार 878 झाडां मारपाची परवानगी दिल्ली. ताच्या बदल्यात 35 हजार 634 झाडांचे रोपे लावपाक सांगिल्ले. तातूंतले 30 हजार 387 रोपे जिवीत आशिल्ल्याचें जापेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
