भांगरभूंय | प्रतिनिधी
झाडां परवानगे बगर कापपाक मेळचीं ना: दरेका झाडाक १ लाख रुपया दंड
नवी दिल्ली, खबरां संस्था: व्हडा प्रमाणांत झाडां कांपप हें मनशाक मारून उडोवपा परस वायट, अशें सर्वोच्च न्यायालयान मंगळारा म्हणलें. पर्यावरणाचें लुकसाण करप्यांचो चुरको करचो न्हय.
बेकायदेशीरपणान कांपपी दरेका झाडा खातीर १ लाख रुपया दंड आकारपाक सर्वोच्च न्यायालयान मान्यताय दिल्या. तशेंच, दंडा आड दाखल केल्ली याचिका भायर मारली.
न्यायमुर्ती अभय एस ओका आनी न्यायमुर्ती उज्ज्वल भुईयान हांच्या खंडपीठान स्पशट केलें, संबंदीत प्राधिकरण वा संस्थेची परवानगी घेतल्या बगर खंयचीच व्यक्ती झाड कापपाक शकना.
खरें म्हणल्यार सर्वोच्च न्यायालय एके याचिकेचेर सुनावणी करताले, जातूंत एका मनशान झाडां कापिल्ले खातीर कसलीच कारवाय करप ना आनी दंडाची मागणी केल्ली.
कायदे आनी झाडां सहज घेवचे ना
कायदो आनी झाडां सहज घेवपाक शकना आनी घेवचींय न्हय, असो स्पश्ट संदेश गुन्यांवकारांक दिवपाक जाप, अशी वरीश्ट वकील एडीएन राव हांची सुचवणी खंडपीठान मान्य केली. अशा प्रकरणांत कितलो दंड घेवचो हाचेय निकश न्यायालयान आपल्या आदेशांत निश्चीत केल्यात.
४५४ झाडां कापलीं आनी दरेका झाडाक १ लाख रुपया दंड
फाटल्या वर्सा शिवशंकर अग्रवाल हांणी मारिल्ल्या ४५४ झाडां खातीर प्रती झाड १ लाख रुपया (वट्ट – ४.५४ कोटी रुपया) दंड आयकयिल्लो, असो केंद्रीय सक्षम समितीचो (सीईसी) अहवाल न्यायालयान स्विकारलो. अग्रवाल हांचो खटलो लढपी ज्येश्ठ वकील मुकुल रोहतगी हांणी खंडपीठाक सांगलें, तांच्या अशिलान आपली चूक मान्य केल्या आनी चुकूय मागल्या.
तांणी न्यायालयाक दंडाची रक्कम उणी करपाची मागणी केल्या, जी तांणी खूब व्हड आशिल्ल्याचें म्हणलां. मुकुल हांणी, अग्रवाल हांकां फकत ते जमनीरूच न्हय तर लागसारच्या सुवातांचेरूय झाडां लावपाची परवानगी दिवची.
न्यायालयान दंडाची रक्कम उणी करपाक न्हयकार दिलो. लागसारच्या वाठारांत झाडां लावपाची परवानगी दिली.
ताज ट्रॅपेझियम झोन म्हणल्यार कितें?
ताज ट्रॅपेझियम झोन हो उत्तर प्रदेशांतलो आग्रा हांगचो ताजमहाल आनी हेर दायज स्मारकां भोंवतणी १०,४०० चौरस किलोमिटरचो संरक्षीत वाठार. ह्या इतिहासीक थळांक धोको निर्माण करपी प्रदुशण आनी पर्यावरणाचो जावपी विध्वंस आडावपा खातीर हाची स्थापना केली. १९९६त न्यायालयान टीटीझेडांत व्हडा प्रमाणांत झाडां लावपाचे निर्देश दिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
