भांगरभूंय | प्रतिनिधी
झांसी, खबरां संस्था ः उत्तर प्रदेशांतल्या झांसींत शुक्रारा रातीं भिरांकूळ दुर्घटना घडली. झांसींतल्या महाराणी लक्ष्मीबाई वैजकी म्हाविद्यालयाच्या सरकारी हॉस्पिटलांत उजो लागून 10 अर्भकांक मरण आयलें. अर्भकांच्या अतिदक्षता विभागात शॉर्ट सर्किटाक लागून हो उजो लागिल्ल्याचो दुबाव आसा.
मेळिल्ले म्हायती प्रमाण, रातच्या धा वरांचे सुमाराक हो उजो लागलो. घडणूकेची म्हायती मेळटकच उजो पालोवपी दळ पोखडोच हजर जालो. उजो पालोवपाचें काम चालू आसतना दुसरे वटेन उज्यांत सांपडिल्ल्या हेर अर्भकांक आनी दुयेंतींक वाचवपा खातीर बचाव कार्य सुरु केलें.
मजगतीं, हो उजो हॉस्पिटलाच्या अतीदक्षता विभागातल्या भितरल्या वॉर्डांत शॉर्ट सर्किटाक लागून उजो लागलो. ताची पुराय चवकशी करपा खातीर तीन उंचेल्या पांवड्यावेल्या अधिकाऱ्यांची समिती स्थापन केल्या. चवकशी करुन ह्या समितीक अहवाल मुख्यमंत्री योगी आदित्यनाथ हांचे कडेन सादर करपाचो आदेश दिला. अतिदक्षता विभागातल्या भायल्या वॉर्डांतल्या सगळ्या अर्भकांक सुरक्षीतपणान वाटायले. पूण भितरल्या वॉर्डांतल्या 10 नवजात भुरग्यांक मरण आयलां. हेर जायते दुयेंतींक वाटोवपाक येस मेळ्ळें ही म्हायती झांसीचे जिल्होधिकारी अविनाश कुमार हांणी दिली.
उत्तर प्रदेशाचे मुख्यमंत्री योगी आदित्यनाथ हांणी हे घडणुके विशीं सोशल मिडिया एक्सचेर एक पोस्ट शेअर करून दुख्ख उक्तायलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
