भांगरभूंय | प्रतिनिधी
जनपद, खबरां संस्था: पोशिल्ल्या जनावरां मदीं सुणो हो मायेस्त आनी विस्वासू जनावर म्हणून वळखतात. मात हालींच हणजुण्यां हांगा एका भुरग्याचो जीव घेवपाक एक पिटबूल सुणो जापसालदार थारलो. ताका लागून गोंयांत पिटबूल ह्या सुण्याची वळख आक्रमक सुणो म्हणून जाल्या. मात झांसी जनपद हांगा एका पिटबुलान घराचे बागेंत आयिल्ल्या सोरपाक मारिल्ल्याचो व्हिडियो व्हायरल जाल्लो पळोवपाक मेळटा. ते बागेंत घरांतलीं भुरगीं खेळटालीं. ह्या पिटबूल सुण्याच्या शिटूकपणान त्या भुरग्यांचो जीव वाटायलो.
ही घडणूक शिव गणेश कॉलनींतली. पंजाब सिंह कुटुंबा सयत हे कॉलनींत रावतात. तांचे कडेन पिटबूल सुण्या सयत हेर सुणींय आसा. ही घडणूक घडली तेन्ना ते घरा नाशिल्ले. मात तांचो चलो, वावराडी आनी हेर ल्हान भुरगीं घराच आशिल्लीं.
ल्हान भुरगीं सांजेवेळार खेळटालीं तेन्ना सोरोप घरांत घुसलो. हो नाग भुरग्यांचे वटेन वचपाक लागलो. भुरग्यांची सोरपाचेर नदर गेली आनी तीं आड्डपाक लागलीं. मात दुसरे वटेन बांदून आशिल्ल्या पिटबुलान आपल्या गळ्यांतलो बॅल्ट तोडलो आनी तो थंय पावलो. ताणें घास मारून त्या सोरपाक आपटून आपटून मारून उडयलो. हो सगळो प्रकार कॅमेर्यांत कैद जाला.
पंजाब सिंह आपल्या पिटबुलाचे खूब उपकारी आसात. सिंह हांच्या म्हणण्या प्रमाण, तांच्या पिटबूल सुण्यान आतां मेरेन सुमार ८ ते १० सोरपां पसून तांचें आनी तांच्या कुटुंबाचें रक्षण केलां. ते अशेंय म्हणटात, की पिटबूल सारकिल्लें बुद्धीमान जनावर आनीक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
