भांगरभूंय | प्रतिनिधी
आकाशवाणीचे सेवेंत आसतनाची गजाल. सादारणशी 1990च्या दसकांत. केंद्र सरकाराचें वर्सुकी बजेट जातालें. तें जातकच आमकां थळाव्या अर्थतज्ञांच्यो एक दोन मुलाखती रिकॉर्ड करून दिल्लीक धाडच्यो पडटाल्यो. प्रतिक्रियांच्या रुपांत इंग्लीशींत. दर वर्सा पणजेंतलो एक जाणकार आमकां ही मुलाखत दितालो. तेन्ना मोबायल नाशिल्ले, संपर्क वेवस्था दुबळी.
कालांतरान, शास्त्रीय जाणकार मुखार आयले. अर्थशास्त्राचे प्राध्यापक, चार्टर्ड अकौंटंट, उद्देजक अशे तज्ञ मेळूंक लागले. ल्हवल्हव आनिकूय सोंपेपण इतलें आयलें की बजेट चालू आसतना हे सगले जाणकार एकेच सुवातेर म्हणजे पणजेंत चेंबर ऑफ कॉमर्सांत मेळपाक लागले. ते दीसभर थंय बसतात. तांच्यो मुलाखती घेवप मिडियाक सोंपें जाता.
हें सगलें सांगपाचें कारण म्हळ्यार आयज गोंयच्या मळार कोण वांयगणो तज्ञ आनी कोण खरो जाणकार हें कळना. मिडियांतले लोकूय कोणाचीय प्रतिक्रिया घेवन उडयतात. एक देख दितां. समजा, घरगुती हिंसा कायदो ह्या विशयाचेर सर्वोच्च न्यायालयान दुरुस्ती केली आनी ताचो नवो मसुदो जारी केलो जाल्यार पेपर वा चॅनल बेगीबेगीन प्रतिक्रिया घेवपाची सर्त सुरू करतात. तातूंत एका आदवोगादाची बायट घेतातूच, अकस्मात आपलो एक इश्ट जाणें घरगुती हिंसा ह्या विशयाचेर नाटक बरयिल्लें ताचीय प्रतिक्रिया घेतात. आतंकवाद ह्या विशयाचेर हांवें नाटक बरयलें दोन वरांचें म्हूण त्या विशयाचो हांव तज्ञ न्हय. विचारपी विचारता, उलोवपी उलयता. हातूंतल्यान मिडियोक्रीटी वाडटा.
आमच्या घरांत धायेक आदवोगाद आसात. एका नाटकांत हांवें मध्यवर्ती भुमिका आदवोगाद पात्राची दवरली. तातूंत म्हाका एक डायवोर्स केस दाखोवपाची आशिल्ली. हांव घरच्या वकिलां कडेन उलयलों. डॉमेस्टीक व्हायोलन्स एक्ट म्हळ्यार घरगुती हिंसा कायद्या खालची केस घेतल्यार ती केस माचयेर नाट्य हाडपाक बऱ्याक पडटली अशें तांणी सांगलें. कारण ह्या कायद्यांतली गुंतागुंत, शक्याशक्यताय, पदर, आयाम, विभ्रम खूब. तांणी लडयिल्ल्या वेगळ्या वेगळ्या केसींची म्हायती आनी युक्तिवाद कशे जाले तें म्हाका सांगलें. पटलें, नाट्यमयतेक तें बऱ्याक पडलेंय. सांगपाचें म्हळ्यार फाल्यां ह्या कायद्यांत नव्यान दुरुस्ती आयली जाल्यार टीव्ही चॅनलान तज्ञ म्हणून म्हाका विचारपाचें आनी हांवें उलोवपाचें? संबंदीत केसी लडोवपी आदवोगादां कडेन मिडियान वासपूस करपाची.
फाटीं एकदां गोंयांत इतिहासाच्या विशयाच्या वादाचें ल्हारूच आयिल्लें. म्हज्या एका मित्रान जाणें केन्ना शिवाजीचो वा संभाजीचो पार्ट लेगीत नाटकांत करूंक नाशिल्लो ताणें दोन पुस्तकां वाचून आपलें म्हणणें मांडूक सुरू केलें. आतां हे लोकशायेंत कोणाकूय मत, अभिप्राय, विचार मांडपाची मेकळीक आसा ती गजाल वेगळी. जांणी हयातभर इतिहासाचो अभ्यास केलो, शेंकड्यांनी पुस्तकां वाचून वेगळ्या वेगळ्या पुरक गजालींचो अदमास ताडलो, जिरयलो, पचयलो त्या इतिहासाच्या प्राध्यापकांचें कितें तर? बायट तांचे जाय. म्हजे कांय वांगडी लेखक तर कित्याचेरूय उलयतात. ए टू झेड. एक्युपंक्चर टू झुलॉजी. वैजकी पदवी घेवन ताचे वयली गायनॅकॉलॉजी पदवी घेवपी दोतोर थंयच उरले. लेखकूच वचून व्याख्यानां दितात. अशास्त्रीय वांयगणे हे.
आमच्या गोंयांत पर्यावरण, न्हंयो, पर्यटन, कोमुनिदाद, नवें शैक्षणीक धोरण आनी हेर खोंटलोभर विशयांचेर उलोवपी घे म्हणून सर्वज्ञ आसात. खरेंच तोखणाय दिसता तांच्या धाडसाची. डिग्री आसली म्हणटकच तो चुकचोच ना आनी सारकी स्पश्टता दितलो अशें ना. पूण शास्त्रीय आसूं वा वांयगणो, जो तज्ञ चुकीची म्हायती दिता तेन्ना तें खटकता. अ का प्रियोळकार हांणी डॉक्टरेट मेळोवंक नाशिल्ली. पूण मुंबय विद्यापिठान तांची विद्वत्ता, हुशारी, बुदवंतकाय पळोवन तांकां कांय पीएचडी विद्यार्थ्यांचे गायड म्हूण मार्गदर्शन करपाक आपयलें. ही एक आगळी गजाल, विरळ. खऱ्या तज्ञांक वळखुपाची.
हालींच अहमदाबादेंत लंडनाक वचपी विमान पडलें. दुखेस्त गजाल. कितलेशेच जाण वळखीचे, मित्र बी, म्हजे कडेन विमानाच्या अपघाताच्या कारणांचेर अशे नेटानेटान उलयताले की हजारांनी एर वरांचो प्रवास केल्ले हे सिनीयर पायलट बी काय? अशें दिसचें. एविएशन, विमानाचें उड्डाण हो विशय आमचो कोणाचोच न्हय. तो तज्ञांचो. पिकपीचीं वा रिक्षेचीं गियरां घट जालीं तशें सगलेंच घट जाल्ल्यान पायलट कांयच करूंक शकलो ना अशें कालूच म्हजो एक मित्र ब्लॅक बॉक्साचो हवालो दिवन विचारिनासतना सांगतालो. विमानाक थ्रॉटल आसता. खूब कितें आसता. आतां सगलें डिजिटल प्रणाली वरवीं जाता. म्हजे कांय पायलट मित्र ह्यो गजाली सांगतात. पूण त्यो तकलेंत वचना. गियरां घट जालीं अशें सांगपी म्हज्या वांयगण्या ज्ञानी मित्रा मुखार म्हजी तकली घट जाली.
राजकारणाचेर, क्रिकेटीचेर सगलेच जाण उलयतात. आवट जातकच क्रिकेटराक खेपतात बी. हांकां वाड्या वेले भुरगे टेनीस बॉल क्रिकेटींत लेगीत खेळूंक घेनात. म्हजो एक सोयरो युक्रेन, रशिया, इस्रायल, इराक आनी हेर देशांच्या झुजाच्या दुश्टचक्राचेर असो कितें उलयता की दिसचें, मडगांव, पाजीफोंड, मालभाट, रावणफोंड, कोंब, घोगळ ह्याच विशयांचेर हो सहज उलयता. रातचो बेगीन न्हिदना. कानाक लावन मोबायलाचेर बातम्यो आयकता. गोंयांत तिसरो जिल्हो खंयचो जावपाचो आसा हें खबर आसचें ना. इस्रायल कित्याक तें? दोळ्यांनी तें गेर्र पळेल्ले वरी म्हाका पटे कातरून सांगता हे म्हजे खातीर ताप. इंटरनेट विद्यापिठाचे हे अडे परिणाम.
आमच्या गांवांत जाण्टेलो दादी आशिल्लो. तो म्हाका कॉलेजांत वता आसतना बशींत मेळटालो. तोवूय सदांच पणजे वतालो. पुडवें, वयर कोट, तोपी, सत्री. ताचो वेवसाय – केसींनी साक्षीदार रावप. आनी सुणीं चडोवप. कितल्याशाच केसींनी तो साक्षीदार रावतालो. ताका आवड ती. वेळूय वतालो. जीव खेळयिल्ले भशेन जातालें. आनी विशेश म्हळ्यार दुडू पानदुडू खेळटालो मेळटालो. ताका इंग्लीश बी कळनासली. केन्नाय म्हाका कोर्टांत व्हरतालो. देपोस्त म्हळ्यार भाटांची अटॅचमेंट केस एकदां ताच्या हड्ड्यार पडली. कितें घडलें तें हांवें ताका उपरांत सांगलें. केस हरिल्लो, पूण म्हाका ताणें सदचे भशेन भोसलेगेर केळ्यां हालवो, पुरी बी दिली. म्हाका भोंगूं शें जालें. पूण जीत हार चालूच आसताली. हालवो थीर.आयज दादी आसल्यार टीव्ही चॅनल गाजोवपाचो. कारण तो कित्याचेरूय उलयतालो. सद्या जें अशास्त्रीय जाणकारांचें पीक आयलां तरतरून, तातूंत खरेंच दादी, वांयगण्यांक वस्ताद थारपाचो. दादी, तूं जाय आशिल्लो.
मुकेश थळी
फोंडें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
