भांगरभूंय | प्रतिनिधी
फोव हे तांदळा पसून तयार करतात. धवेफुल्ल फोव, गांवठी तांबडे फोव. फोवाच्या खंयच्याय जीनसाक भलायकीयुक्त नाश्तो असो भोवमान मेळ्ळा. फोवाचे तरेकवार जीनस करतात. गोड ,खोबरें, वेलची पावडर घालून फोव कालयतात. समप्रमाणांत सगले जिनस घालून बटाट फोव, करबील, सांसवां फोडणी मारून तिखट फोव, दुद, नाल्लाचो आपरोस, गोड वेलची घालून केल्ले फोव जिभेक सामके रुचीक लागतात.
फोवाचे गोडाचें मेल, भाजिल्लीं भिकणां, भाजिल्ली चण्या दाळ घालून रुचीक लाडू जातात. फोवाचो खूब बरो उपेग जाता. आमचीं बायलां उपास, तापासाक गोड सोय घालून कालयिल्ले फोव खातात. देवपुजेक पसून केन्ना केन्ना फोव आनी नाल्लाची कातली घाल्लो निवेद्य दाखयतात.
गोकुळाश्टमीक तर दरेकवार दुद, ताक, धंय, बटाट फोव, गोड, सोय घालून कालयिल्ले फोव कृष्णाक निवेद्य दाखयतात. ताका फोव खूब आवडटात. दिवाळेक नरकासूर दहन करतकच न्हावन धुवन काट्टां फोडले उपरांत तरेकवार फोव खावपाची परंपरा आयजूय सगले पाळटात.
सकाळीं फोवाचो नाश्टो आमकां उर्जा दिता. दनपार मेरेन भूक सतायना. फोडणी फोव, बटाट फोवान पोट टुम्म भरता. जिवाक थाकाय मेळटा. फोव खाल्यार वजन नेटान कमी जाता. फोव हो पुर्ण आहार. आमचे दिसपट्टे जिणेचो एक मुखेल घटक. तातूंत कार्बोहायड्रेट्स, लोह आनी फायबर खूब प्रमाणांत आसा. तशेंच फोवांत अॅटी आॅक्सिडंट आनी खूबशी जिवनसत्वां आसात. तातूंत कर्बाचें प्रमाण कमी आसता. फोवांत इन्सुलीन कमी आशिल्ल्यान ते वजन कमी करता. फोवांत लोह भरपूर आशिल्ल्यान गुरवार बायलो आनी भुरग्यांक दूद पाजपी बायलांक शिजयिल्ले फोव गोड, सोय, मीठ घालून दिल्यार खरेंच बरें.
खर्च कमी, कश्ट कमी, वेळूय कमी अशे हे झटपट तयार जावपी फोवाचे तरेकवार जिनस. इल्ले खाल्यार पसून पोटाक बरे. भायले जिनस खावचे परस फोव खावप खरेंच बरें. म्हणून ताका झटपट नाश्तो म्हणटात.
सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
