भांगरभूंय | प्रतिनिधी
मुंबय, खबरां संस्था: दर वर्सा प्रमाण अंदूंय वडाचे पुनवे दिसा बायलो वडाच्या झाडाक प्रदक्षिणाक घालून पुजा करतात आनी घोवाच्या दीर्घ आयुश्याची मागणी करतात. हो लग्नसंबंद सात जल्म मेरेन तिगून उरचो आनी जोडीदाराक आदार मेळचो, जोडीदाराक दीर्घ आयुश्य मेळचें म्हणून ही पुजा करतात. मात ह्या आधुनीक काळांत वडाचे पुनवेची परंपरा मोडून उडोवपी एक नवी प्रथा सध्या जायत्या जाणांचें लक्ष ओडून घेता.
एके कडेन दर जल्माक होच घोव मेळचो म्हणून बायलांचे उपास, पुजा सुरू आसतना दुसरे कडेन मात महाराष्ट्रांतल्या छत्रपती संभाजीनगरांत पिपळा पुनव मनयली. पिंपळाक ७ प्रदक्षिणा मारीत घोवाक मुठीन धरपी, ‘लग्नाचे जिणेंत मतभेद निर्माण करपी बायलो फुडल्या जल्मांत नाका रे बाब!’ अशी प्रार्थना करीत दादल्यांनी पिंपळाच्या झाडाक ७ प्रदक्षिणां मारल्यो. बायलां कडल्यान पिडेस्थ संघटणेन हो उपक्रम राबयल्ल्याचें सांगलें.
तोच घोव मेळोवपा खातीर बायलो वडा भोंवतणी प्रदिक्षणां काडटात, जाल्यार कांय बायलो ताका आडवाद जावन बायलां सशक्तीकरणा खातीर कायद्याचो गैरवापर करतात अशें दिसता. कांय बायलो कायद्याच्या नांवान घोवाक आनी घोवाच्या कुटुंबाक आडकून दवरतात, अशे परिस्थितींत दादल्यांकय मानसीक त्रास सोंसचे पडटात. हाचो निशेध म्हणून ही पिपळाची पुनव प्रतिकात्मक रितीन मनयतात अशें हे संस्थेचें मत आसा.
पांच वर्सां सावन मनयतात पिपळा पुनव
दादल्यांच्या समस्यां कडेन, तांचेर जावपी अन्याय आनी तत्सम प्रस्नांचेर समाजाचें आनी सरकाराचें लक्ष ओडून घेवपा खातीर ही पिपळाची पुनव पांच वर्सां सावन बायल कडल्यान पिडेस्त दादले मनयतात. दादल्यां विशीं आशिल्ली समाजीक मानसिकताय सुदारपाची गरज आसा अशी मागणी ही संस्था करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
