भांगरभूंय | प्रतिनिधी
गोंयच्यो आदल्यो मुख्यमंत्री शशिकलाताई काकोडकार एक कणखर नारीशक्ती. मनाक भावता तें उक्तेपणान उलोवपी. गोंयचे पयले मुख्यमंत्री दयानंद बांदोडकार हांणी ते सरकारांत आसतना व्हडले धुवेक म्हणल्यार शशिकलाताईंक राजकारणांत हाडलें. शशिकलाताईंनी बांदोडकर उद्येगसमूह सांबाळ्ळोच ते भायर भाऊंच्यो राजकी उत्तराधिकारी म्हणून त्यो मुख्यमंत्रीय जाल्यो. तांचे मागीर गोंयांक आतां मेरेन एकूय अस्तुरी मुख्यमंत्री मेळूंक ना. संसदेंत 33 टक्के बायलां राखीवता विधेयकाक मान्यताय मेळिल्ल्यान फुडारांत राज्याक दुसऱ्यो, तिसर्यो अस्तुरी मुख्यमंत्री मेळटल्यो अशी आस्त बाळगुया. ते खातीर गोंयचे नारीशक्तीन राजकारणांत येवपाची तयारी आतां सावन करची पडटली.
मुख्यमंत्री डॉ. प्रमोद सावंत हालीं तेच खातीर बायलांक फुडारांत विधानसभेंत 13 सुवाती मेळटल्यो अशें सांगपाक लागल्यात. मुख्यमंत्र्यांची अकरावेचें शिक्षण घेवपी धूव पार्थिवी हालींच जाल्ल्या विज्ञानीक डॉ. रघुनाथ माशेलकार हांच्या व्याख्यानाक आयिल्ली. मुख्यमंत्री माचयेर, मुखार तांची चली, शशिकलाताईंची भयण ज्योती बांदेकार, ताईंचे पूत यतीन काकोडकार, पयलींचे केंद्रीय कायदोमंत्री रमाकांत खलप, आमदार अॅड. कार्लोस फेरेरा. डॉ. सोमनाथ कोमारपंत, गौरीश धोंड, खण खातें संचालक सुरेश शानभाग, प्रजल साखरदांडे, अंजू साखरदांडे, प्रा. वृंदा बोरकार, प्रा. मनोज कामत, दिपाली बाणस्तारकार, निमा आमोणकार आनी कालच्या, आयच्या पिळगेंतल्यांची हजेरी. हजर आशिल्ल्यां मदीं पार्थिवी पिरायेन सगल्यांत ल्हान आसतलें. ना येतना मुख्यमंत्र्यां बराबर तें आयलें, गेलें. कितल्या जाणांनी पार्थिवीक वळखलां आसतलें? डॉ. माशेलकार हांचे वरी व्यक्तीमत्व पळोवपाची संद पार्थिवीक मेळ्ळी. मोपा विमानतळाच्या उक्तावणा वेळार प्रधानमंत्री नरेंद्र मोदी हांकांय पळोवपाक मुख्यमंत्री पार्थिवीक मुद्दाम घेवन गेल्ले.
शशिकलाताई भाऊंक मेळूंक येवपी व्यक्तीमत्वां पळयत राजकारण शिकल्यो. साडेतीन दसकांचे पत्रकारितेंत जेन्ना जेन्ना ताई कडेन उलोवपाची संद मेळ्ळी तेन्ना त्यो नांवां घेवन, घेनासतना भाऊ, भाई, ताई, माई, आका, आपाच्यो खबरी सांगताल्यो. ताईंनी जें सांगलें तें बरोवप हें एक आव्हान आसतालें. राजकारणी सांगतात तें पत्रकारांनी सगलें बरोवपाकच जाय अशें ना. वाचकांक वेगळें, सदां यादींत उरतलें अशें लिखाण आसचें. पुस्तकमोगी ताई बऱ्यो वाचकय आनी ते खातीर आमचे खातीर एक आदर्श. भाऊं, ताई महाराष्ट्रवादी, मराठी मनीस म्हणून कोणेंय कितलें सांगलें तरी बांदोडकार घराबो गोंयचेर, गोंयकारांचेर मोग करपी. ताई राजभाशेचो विशय कोंकणी, इंग्लीश, मराठींतल्यान मांडटना भावूक जातना, तिडकतना आमी पळेल्यात. आपल्या पुतांक राजकारणांतल्यान पयस दवरून तांकां निर्णयक्षम उद्येजक म्हणून घडोवपी ताई वेगळ्योच. वेळार क्रियाशील राजकारणांतल्यान एक्झीट घेवन ताईंनी आदर्शवाद राखलो. कला, शिक्षण, समाजीक प्रस्नाचेर आवाज उठोवप तांणी चालूच दवरिल्लें. गोंयची स्त्रीशक्ती साक्षर जावची म्हणून भाऊंच्या उपरांत तांणी केल्ले यत्न विसरूंक जावचे ना.
शिक्षण, समाज, उद्येग, वेवसाया कडेन नवे नदरेन पळेतना ताईंचे पूत यतिन, आदले मुख्यमंत्री मनोहर पर्रीकार हांचे पूत उत्पल फुडारांत गोंयच्या राजकारणांत आसपाची गरज आसा. पयलींचे मुख्यमंत्री आमदार दिगंबर कामत, शेतकाममंत्री रवी नायक आपल्या पुतां खातीर राजकारणांतल्यान एक्झीट घेवपाची मनाची तयारी करतात. हेरांनीय तांची देख घेवची. आदल्यो वीजमंत्री निर्मला सावंत हांचे पूतय उद्येजक, ते राजकारणांत येत व्हय? निर्मलाताईंक एकमतान लोकसभेर किद्याक धाडचें न्हय?
33 टक्के बायलां राखीव सुवातींतल्यान ज्योती बांदेकार, ज्योती ढवळीकार, बिना नायक, सुलक्षणा सावंत, स्नेहा भागवत, शमी साळकार, श्रद्धा आमोणकार, नगराध्यक्ष रश्मी देसाय आनी हेर राजकी दृश्टीन सक्षम आसात. तांचे बराबरीन शिक्षणीक क्षेत्रांत आशिल्ले स्त्रीशक्तीन राजकारणांत कित्याक येवचे न्हय?
पयलींचे मुख्यमंत्री लक्ष्मीकांत पार्सेकार हांची धूव शांभवी, पयलींचे सभापती विश्वास सतरकार हांची भयण विद्या गावडे, सभापती रमेश तवडकार हांच्यो घरकान्न सविता, हांकांय राजकारण कळटा.
आरोग्यमंत्री विश्वजीत राणे हांची घरकान्न आमदार देविया, आमदार जेनिफर मोन्सेरात, आमदार डिलायला लोबो हांचेंय स्वतंत्र व्यक्तीमत्व घडटा. आरोग्यमंत्र्यांची भयण विश्वधारा डहाणूकर महाराष्ट्रांतल्यान राजकारणांत येत? आदले आरोग्यमंत्री डॉ. सुरेश आमोणकार हांच्योय दोन उच्च शिक्षण घेतिल्ल्यो धुवो आसात. आरोग्यमंत्री श्री. राणे हांच्यो धुवो, मुख्यमंत्र्यांची धूव पार्थिवी ह्यो उपरांतचे पिळगेंतल्यो. उच्च शिक्षण घेतल्यार, समाजमन वळखूंक शिकल्यार गोंयची स्त्रीशक्ती राजकारणांतय सक्षम जावंक शकता. पयसो हातांत आसा म्हणल्यार वेंचणूक जिखली अशें न्हय. वेंचणुके आदीं दोन वर्सां तरी मतदारसंघान तळागळांतल्यान मना काळजा सावन वावर करप म्हत्वाचो. प्रतिमा कुतिन्हो, वालंका आलेमांव तें करतात? तयार जायात, लोकसभा, गोंय विधानसभे खातीर समाजकारणांतल्यान. शिकात, वाचात, अभ्यासांतल्यान फुडें वचात.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
