भांगरभूंय | प्रतिनिधी
भांगरभूंय । प्रतिनिधी
पणजीः ज्येश्ठ पत्रकार तशेंच पणजी दूरदर्शन आनी पणजी आकाशवाणीचो निवृत्त उपसंचालक सतीश नायक हाच्या पिरायेच्या अमृत महोत्सवा निमतान बुधवार 6 मार्चाक ज्येश्ठ पत्रकार संघटना, गोंय खेळां पत्रकार संघटना तशेंच सहकार इश्ट मंडळाच्या जोड पालवान पणजे आझाद मैदाना कडल्या गोंय चेंबर ऑफ कॉमर्स सभाघरांत सांजे 5 वरांचेर आयोजीत केल्ले खाशेले कार्यावळींत भौशीक भोवमान करतले.
हे कार्यावळीक पर्वरेचो आमदार आनी पर्यटन मंत्री रोहन खवंटे मुखेल सोयरे म्हणून हाजीर रावतले. सतीश नायक हाणे नवप्रभा दिसाळ्यांतल्या आपली पत्रकारिता सुरू केली. उपरांत गोंय सरकाराच्या म्हायती खात्यान म्हायती अधिकारी म्हणून काम केलें. ते उपरांत ते केंद्र सरकाराच्या म्हायती सेवेंत रुजू जाले. आकाशवाणी, दूदर्शन आनी केंद्र सरकाराच्या पीआयबीत वेगवेगळ्या हुद्द्यांचेर काम करून नायक निवृत्त जालो.
गोंय खेळां पत्रकार संघटना आनी गोंय ज्येश्ठ पत्रकार संघटनेच्या स्थापणुकेत सतीश नायक हाचो म्हत्वाचो वाटो आसा. गोंयांत आंतर प्रसार माध्यम क्रिकेट, फुटबॉल, टेबल टॅनीस आनी हेर मॅची आयोजीत करपाक ताणे सुरवात केल्ली. पिंगुळीच्या संत अण्णा महाराज हाच्या वावरांत ताचो वांटो आसतालो. जायत्या सामाजीक आनी सांस्कृती संस्था कडेन ताचो लागींचो संबंद आसा. सद्या ते गोंय ज्येश्ठ पत्रकार संघटनचो अध्यक्ष म्हणून काम पळयता. नायक हाचे बरें मागपी आनी इश्टांनी व्हडा संख्येन हे भोवमान कार्यावळीक हाजीर रावचें अशें सहकार इश्ट मंडळाचो अध्यक्ष, आदलो आमदार धर्मा चोडणकार आनी ज्येश्ठ पत्रकार संघटनचो सरचिटणीस सुभाष नायक हाणे मागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
