ज्येश्ठ नागरीकांक रेल्वे वतीन सवलत

भांगरभूंय | प्रतिनिधी

नवी दिल्ली, खबरां संस्था : दरेक रेल्वे प्रवासी गाडयेंत स्लिपर क्लासींत ६ बर्थ, एसी-३, एसी-२त ३ बर्थ राजधानी/दूरंतोत ४ बर्थाचेर आरक्षणा खातीर नियोजीत आसतले. ज्येश्ठ नागरीक, दुयेंत प्रवासी, दिव्यांग प्रवसी हांकां व्हील चॅर फुकट उपलब्ध करून दितले. तशेंच ज्येश्ठ नागरिकांक मार्गदर्शी मजत करपी (अधिकृत कुली) जाय पडल्यार तांचें वेगळें शुल्क भरचें पडटलें.
रेल्वे प्रशासनान कांय म्हत्वाच्या रेल्वे स्टेशनांचेर दुयेंत, दिव्यांग आनी ज्येश्ठ नागरीक प्रवाश्यां खातीर बॅटरेचेर चलपी आधुनीक व्हिलचॅर उपलब्ध करून दितले. ज्येश्ठ नागरीक, दिव्यांग आनी दुयेंत रेल्वे प्रवाश्यांचे सेवे खातीर आयआरसीटीसी विशेश/यात्री मित्र सेवा/ खुबश्या व्हड रेल्वे स्टेशनांनी सुरू केल्यात. ह्या सवलतीं खातीर प्रवासी ऑनलायन बुकींग करपाक शकतात.
रेल्वे प्रवासी गाडी सुटले उपरांत वयले सवलतीचे आरक्षीत लोअरबर्थ रिकामें आसल्यार रेल्वे टिकीट तापसणेक वेटींग चार्टांतल्या ज्येश्ठ नागरीक, दिव्यांग, गुरुवार बायल हांकां पयलें प्राधान्य दिवन उरिल्ले बर्थ हेर सगळ्या प्रवाश्यां दिवपाक शकता.

मेळपी सवलती
१. दादलो ज्येश्ठ नागरीक सवलतीची पिराय ६० वर्सां पुराय वा ताचे परस चड आसपाक जाय.
२. बायल ज्येश्ठ नागरीक सवलतीची पिराय ५८ पुराय वा ताचे परस चड आसपाक जाय.
३. दादल्यांक ४०% रेल्वे प्रवसी भाडें सवलत.
४. बायलांक ५०% रेल्वे भाडें सवलत.
५. मेल/ एक्सप्रेस/ राजधानी /शताब्दी/ जनशताब्दी/ दुरंतो ह्या रेल्वे प्रवसी गाडयांनी खंयच्याय श्रेणींत ही सवलत मेळटली.
६. रेल्वे आरक्षण/ वा सर्वसादारण तिकीट काडटना पिरायेचो खंयचोच दाखलो दिवपाची गरज ना.
७. मात रेल्वे प्रवास करतना रेल्वे तिकीट तपासणी (टीसी) खातीर मागल्यारपिरायेचो दाखल्या संबंदी पुरावो म्हणून पॅनकार्ड, आधारकार्ड, वाहनचालन परवानो, ना जाल्यार खंयचेय फोटो आशिल्लें शासनमान्य वळखपत्र दिवप गरजेचें.
८. ज्येश्ठ नागरीक आपली रेल्वे तिकीट खंयच्याय तिकीट/आरक्षण कार्यालयांतल्यान वा इंटरनेटा वरवीं विकत घेवपाक शकता.
९. प्रवासी आरक्षण पद्धतींत (पीआरएस) ज्येश्ठ नागरीक, गुरवार बायलो, तशेंच जांची पिराय ४५ परस चड आशिल्ल्यो बायलो, असल्यांक रेल्वेंत प्रवास करतना लोअर बर्थची आरक्षीत सेवा दितात.