भांगरभूंय | प्रतिनिधी
अायज 21 ऑगस्ट. हो दीस राष्ट्रीय ज्येश्ठ नागरीक दीस म्हणून मनयतात. अमेरिकेचे आदले अध्यक्ष रोनाल्ड रेगन हांणी 1988 वर्सा अमेरिकेंत तांचे आदले अध्यक्ष बेंजामिन हॅरिसन (1889 ते 1893 कार्यकाळ) हांचे यादीन तांच्या वाडदिसा निमतान 21ऑगस्ट हो दीस ‘सिनियर सिटिझन’ दीस म्हणून थारायलो. बेंजामिन हे स्वतः एक वकील आशिल्ल्यान खुबश्या जाण्टेल्यांक तांणी न्याय मेळोवन दिल्लो. हो दीस मनोवपाचीं दोन मुखेल कारणां जावन आशिल्लीं, तीं म्हणल्यार एक ह्या वयावेली भलायकी आनी दुसरें घरांनी भुरग्याकडल्यानच जायत आशिल्ली सतावणूक. अशी सतावणूक जायत जाल्यार आतां मदत मेळोवपा खातीर हॅल्पलायन सेवा आसा. जशी 1253 आनी14567 ह्या क्रमांकाचेर फोन लावन म्हायती घेवं येता.
भारतान 21 ऑगस्ट 1991 सावन हो दीस मनोवपाक सुरुवात केल्ली. खूब फावट अशें दिसून येता की भुरगीं शिकून सवरून व्हड जालीं की कामा- वेवसायाक लागून दुसऱ्या शारांत वा दुसऱ्या देशांत वतात. अशा वेळार आवय-बापूय गांवघरा एकटींच उरतात. एके तरेन तीं अनाथ जाल्लेवरी जातात. पिरायेची साठी हुपली की कोणूय एक मनीस ज्येश्ठ नागरीक म्हणूं येता. समजा एखाद्याचे आयुश्य शंभर वर्सां आसा जाल्यार ताचीं उरिल्लीं चाळीस वर्सां जाता तितलीं बरी करून कशीं वतलीं तें ताणें स्वता आनी ताचे फामिलेन पळोवंक जाय. हे खातीर आवय- बापाय वांगडा जाण्टेपणांत तांचीं भुरगीं बरोबर आसप गरजेचें.
अशा पिरायेचेर शरीर ल्हवू ल्हवू थकपाक लागता. प्रेशर, डायबिटीस सारखे रोग आसत जाल्यार ते त्रास करूंक शकतात. तातूंत आयकूंक कमी येवप, दोळ्यांनी मोतीबिंदू जावप, यादी उरप ना, स्नायु हाडां अशक्त जावप अशे कितलेशेच बदल पिराये प्रमाणें आमच्या शरीरांत ल्हवू ल्हवू जायत रावतात. अशा वेळार कोणाची तरी सतत मदत जाय पडटा. थोडक्यात कितें तर जशी ल्हान भुरग्याक आमी सांबाळतात तशीच आमका जाण्टेल्यांची कुयदाद घेवची पडटा.
जेन्ना आपूण ज्येश्ठ नागरीक गटांत येता तेन्ना ओगीच आपूण आतां म्हातारो जालों, आतां हांव थकलों, कांय उपेगाचो ना, असले न्हयकारात्मक विचार तकलेंत हाडूंक जायनात. आपूण आपल्याक जाता तितलो ‘फीट’ कसो दवरूंक शकता हें पळोवंक जाय आनी ती तांच जापसालदारकी जावंक जाय. हे खातीर वेळोवेळ व्यायाम, एक अर्दवराची पासय, सूर्य नमस्कार, कांय योगासनां करूंक जाय.
आपलें जेवण खाण मर्यादीत, पचता तशें आसूंक जाय. तातूंत शीत, नुस्तें, भाजयो, कडधान्य, आनी फळांचो आसपाव आसूंक जाय. उदकय बी सात आठ ग्लास पिवंक जाय. जे आपल्या शरिराक मानवना ते जिन्नस दुसरो सांगता म्हणून आपणें खावप- पिवप आसना. जर कसलींय वखदां चालू आसात जाल्यार तीं वेळोवेळ घेवंक जाय.
आपल्यो आवडी सांबाळपाक ही पिराय एकदम योग्य. कोणाक पदां म्हणपाक आवडटा तर कोणाक चित्रां काडपाक. कोणाक बरोवंक आवडटा, तर कोणाक वाचूंक. थोड्यांक भोवपाकय आवडटा. ह्या वयार आपल्यो आवडी पूर्ण करपाक वेळ दिलो जाल्यार आमची मानसीक भलायकी बरी उरता.
आपल्या पिरायेच्या इश्टां बरोबर वेळ घालयलो, घरगुती कार्यावळींनी वांटो घेवन हातभार लायलो, तेच प्रमाण समाजा खातीर कांय उपयोगाचें काम करत जाल्यार मानसीक समाधान नक्कीच मेळटा आनी ताका लागून न्हीद बरी पडटा.
भलायकी बरी उरपाक सात-आठ वरां न्हीद सामकी गरजेची. खूब वेळा सरकारी ऑफिसांनी वा हॉस्पिटलात वा बँकांनी सिनियर सिटिझन हो बोर्ड लगिल्लो आसता, पूण जाय तशी मदत मेळना. आपल्याक लागतात त्यो दिसपट्टेच्या गरजेच्यो वस्तू वा वखदां भायर वचून हाडपाक एक एक फावट जमना. अशा वेळार एखादी तरणाट्यांची सामाजीक संस्था वा सरकारी गट कार्यरत आसत जाल्यार खूब मदत जावंक येता.
आदले रासवळ कुटुंब पद्दतीक लागून जाण्टेलीं आनी ल्हान भुरगीं एकामेकां बरोबर रावन मजेंत दीस काडटालीं. आता ल्हान त्रिकोणी कुटूंब ही संकल्पना येत सावन जाणट्यांनी खंय रावप, कोणा कोणाच्या सांगातान रावप हो प्रस्न पडटा.
तशें पळोवंक गेल्यार ज्या आवय-बापायन कश्ट घेवन आपल्या भुरग्यांक व्हड केल्यात, तांची बरी कुयदाद घेतल्या, त्या भुरग्यांची जापसालदारकी आसता की ह्या जाणटेल्यांचो सांबाळ करप. जाण्टेल्यांनीय बी आपले मत थोडें कडेक दवरून, किटकिट, पिरंगण, करनासतना जाता ती मदत करून रावंक शिकपाक जाय. घर संसाराच्या मोयपासांतल्यान म्हणा वा जबाबदारींतल्यान म्हणा, ल्हवू ल्हवू भायर सरपाक जाय. आपले हट्ट, आपली मतां कडेक दवरूंक जाय. अॅडजस्ट जावंक जाय.
डॉ. नूतन देव
फोंडें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
