भांगरभूंय | प्रतिनिधी
पिरायेची साठ वर्सां हुंपली काय ज्येश्ठ नागरीक अशें सगलेच म्हणटात. आमच्या घरांतलीं आजो, आजी, आवय, बापूय, कुटुंबांतले हेर ज्येश्ठ वांगडी हे आमच्या घराचे खरे आदारस्तंभ. तांचे कडेन बरे, वायट गजालींचें सखोल ज्ञान आसता. प्रत्येक गोश्टीची तांकां जाणीव आसता. तांणी पळयिल्ले पावसाळे तांकां खूब अणभव दितात. अणभवांतल्यान मेळिल्ल्या गिन्यानाचें भांडार तांचे कडेन आसता. जरी ते आतांच्या मानान शिक्षणांत कमी आसात, तरीय खंयच्या बऱ्या- वायट प्रसंगात ते खंबीरपणान, भियेनासतना तोंड दितात.
एकाच पाख्या खाला एकत्र कुटुंबांत राविल्ले आमचे पूर्वज, घरांत जल्मुपी भुरग्यांचेर बरे संस्कार करी, ताका आपलो हात दिवन चलपाक, उलोवपाक शिकय, भुरग्यांचें योग्य तरेन संगोपन करी.तांचे लाड, हट्ट पुराय करी. तांकां रामायण- महाभारतांतल्यो गोड गोश्टी सांगी. खरेंच ते आमचे शिल्पकार. आमी खूबच भाग्यवान आमकां तांणी आकार दिला.
काल 21 आॅगस्टाक संवसारभर ज्येश्ठ नागरीक दीस मनयलो. त्या दिसा जाण्ट्यांक खूश दवरपाचें काम आमचें. घरांतल्या सगल्यांनी तांकां कदेलाचेर बसोवन तांकां हळद- कुकूम लावन, फुलांचो हार गळ्यांत घालून तांची पुजा करपाचो. तांचे आशिर्वाद घेवपाचो. सगल्यांचें हें कर्तव्य. सगल्यांनी हो दीस उमेदीन मनयला आसतलोच. अशें केल्ल्यान तांकांय खोस भोगता. आपल्या भुरग्यांचेर आशिल्लें प्रेम, माया, आपुलकीचें नातें अतुट उरतलें. घरांतलें वातावरण मंगलमय जातलें. ल्हान भुरग्याक बरे संस्कार मेळटले.
ज्येश्ठ नागरिकाक समाजांत फावो तो मान, सन्मान, आदर दिवप खरेंच बरें. पूण, थोड्या घरांनी तांकां वायट वागणूक मेळटा. पूत लग्न जालो काय बदलता, सून माय, मावाच्या खाण्या- पिण्या कडेन आडनदर करता, अशें दिसून आयलां. खरें तर जाण्टेपणार तांकां सुशेगाची, वेळार खावपा, पिवपाची, वखदांची गरज आसता. शरीर थकिल्ल्यान उठपा, बसपाक पसून खूबच त्रास जातात. ह्या वेळार कांय घरांनी तांच्या आंगा, खांद्यार खेळिल्लीं, बागडिल्लीं नातरां पसून तांच्या म्हऱ्यांत येनात. हें चित्र पळयतकच मन उदास, दुख्खी जाता. शेवटाक घरांतली अडगळ म्हूण तांकां वृद्धाश्रमाची वाट दाखयतात. मागीर तांकां तांचो पूत, सून, नातरां पसून वळून पळयनात.
आपल्या पदराक आशिल्ले पयशे ते वृद्धाश्रमाक दितात. थंय तांची खावपा,जेवपाची, वखदांची तजवीज करतात. खरेंच हो प्रसंग पळोवन दुख्ख भोगता. काळीज तीळ तीळ तुट्टा तांचे हाल, यातना पळोवन. म्हातारपण कोणाकूच चुकूंक ना. आयज म्हाका, फाल्यां तुका.आयजी तरुण पिळगी म्हातारी जातली, तेन्ना तांचीं भुरगीं तांकांय वृद्धाश्रमाची वाट दाखयतलीं हातूंत दुबाव ना. आमच्या सरकारान दयानंद समाजीक सुरक्षा, गृह आदार, दीनदयाळ, विधवा पेन्शन येवजण्यो चालीक लायल्यात. ज्येश्ठ नागरिकांक हो आशेचो किरण जावन आसा. ह्या पयशांचो योग्य उपेग तांच्या वखदां खातीर जाता. सगल्या ज्येश्ठांचो आमी सांबाळ करूंया.
सिद्धी तिळवे
९१५८२००९५६
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
