भांगरभूंय | प्रतिनिधी
सायबर गुन्यांवकार जाल्यात ठकसेन
पणजी : सायबर गुन्यांवकार खुबश्या जाणांक कोट्यांनी रुपयांक फटयतात. सीबीआय, ईडीचे अधिकारी आशिल्ल्याचें सांगून डिजिटल अरेस्ट दाखोवन फटोवप, पयशे दुपेटीन, तिपेटीन करपाचें हांयस दाखोवन ऑनलायन गुंतवणूक करपाक सांगून फटोवप अशे प्रकार घडतूच आसात. तिसवाडींतल्या एका 72 वर्सां पिरायेचें निवृत्त ज्येश्ठ मनशान ऑनलायन गुंतवणूक केले उपरांत 4.74 कोटी रुपया वगडायले. हो गोंयचो आतां मेरेनचो सगल्यांत व्हड गुंतवणूक घोटाळो मानतात. ही घडणूक ह्याच म्हयन्यांत घडली.
घोटाळ्याची म्हायती
सोशल मीडियाचेर जायरात केल्ल्या बनावट इनिशियल पब्लिक ऑफरिंग (आयपीओ) गुंतवणूक येवजणे वरवीं हांयस दाखयलें. उपरांत फटींगपणा करप्यान आपली पात्र संस्थात्मक खरेदीदार (क्यूआयबी) म्हणून वळख निर्माण केली. ज्येश्ठ नागरिकाक गुंतवणूक ऑफर कायदेशीर आसा आनी तातुंतल्यान उच्च परतावो दितले हें त्या ज्येश्ठ नागरिकाक पटोवन सांगपाक ते येसस्वी थारले. उपरांत त्या ज्येश्ठ नागरिकान खुबश्या हप्त्यांतल्यान पयशे हस्तांतरित करून गुंतवणूक केली. हप्प्त्यांनी गुंतवणूक पुराय जाले उपरांत प्रतिसाद मेळप बंद जाले आनी कसलेच तरेचो परतावो मेळूंक नाशिल्ल्यान ज्येश्ठाक आपल्याक फटयल्ल्याचें जाणवलें.
ताणें हे विशीं कागाळ दाखल केले उपरांत गोंय पुलिसांच्या अर्थीक गुन्यांव फांट्यान गुन्यांव दाखल करून तपास सुरू केला.
मजगतीं, गोंयच्या ज्येश्ठ नागरिकांक अशे तरेन सायबर गुन्यांवकार लक्ष्य करतात. मर्यादीत डिजिटल साक्षरता, विस्वासू सभाव आनी रोखडेच मजतीचो उणाव, हाका लागून ज्येश्ठ नागरीक असल्या घोटाळ्यांक बळी पडटा अशें पुलिसांचें म्हणणें.
णव म्हयन्यांत 36 जाणांक फटयले
गोंयांत फटल्या णव म्हयन्यांत अशे तरेन 36 जाणांक फटयिल्ल्याची म्हायती मुखार आयली.
गोंयांतले सगल्यांत व्हड घोटाळे
-97 लाखांचो डिजिटल अटक घोटाळो (जुलय 2025): तिसवाडीचे एके बायलेक एकल्यान आपूण सीबीआय अधिकारी आशिल्ल्याचें सांगून 97 लाख रुपयांची तोपी घाल्ली. ह्या प्रकरणांत एका 23 वर्सां पिरायेच्या तरणाट्याक अटक केल्ली.
-1.05 कोटी रुपयांचो डिजिटल अटक घोटाळो (ऑगस्ट 2025): बनावट अटक वॉरंट आशिल्ल्याचें सांगून केपेंच्या एका थळाव्या कडल्यान 1.05 कोटी रुपया भायर काडले. ह्या प्रकरणांत केरळाच्या एका मनशाक अटक केली.
-1.18 कोटींचो फेडएक्स पार्सल घोटाळो (सप्टेंबर 2025): एका निवृत्त ज्येष्ठ नागरिकाच्या पार्सलांत ड्रग्ज आशिल्ल्याचें सांगून तांकां 1.18 कोटी रुपयांची तोपी घाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
