ज्येश्ठ नागरिकांक अर्थीक मजत

भांगरभूंय | प्रतिनिधी

अर्थसंकल्पांत करतले तरतूद: सुभाष फळदेसाय

मडगांवां संवसारीक ज्येश्ठ नागरीक दीस दबाज्यान

ज्येश्ठ नागरिकां खातीर गरजेची ती अर्थीक मजत दिवपा खातीर फुडल्या वर्सा गोंयच्या अर्थसंकल्पांत तरतूद करतले. ज्येश्ठां खातीर गरजेची अशी खेळां सर्त डिसेंबर मेरेन आयोजीत करतले. खावपा-पियेवपाची, भलायकी विशीं सेवा दितले अशें समाज कल्याण मंत्री सुभाष फळदेसाय हांणी सांगलें.

ज्येश्ठ नागरीक दिसा निमतान मडगांव रवींद्र भवनांत कार्यावळीचें आयोजन केल्लें. ह्या वेळार मंत्री सुभाष फळदेसाय, आमदार उल्हास तुयेंकार, असोसिएशनाचे अध्यक्ष डायगो डिकॉस्टा, आमदार दिगंबर कामत, राजेंद्र तालक बी मानेस्त हाजीर आशिल्ले. ह्या वेळार विवीध मळार काम केल्ल्या ज्येश्ठ नागरिकांचो भोवमान केलो.

सद्या पालकांक वेळ दिवपा खातीर भुरग्यां कडेन वेळ ना. करिअरा फाटल्यान धांवतना खंय तरी संस्कृती विसरतात. दुसरे वटेन भुरग्यांचे उदरगतींत आडखळ नाका हे खातीर पालकांनीय ही परिस्थिती स्विकारल्या. हाका लागून भुरग्या कडल्यान म्हयन्याचो 20 ते 25 हजार खर्च करून पालकांक बरी सोय करून दिवपाची तयारी आसल्यार तशी सगल्या सुविधांनी युक्त सोय आसची. ते खातीर समाजांतल्या दात्यांनी मुखार येवचें अशें मंत्री फळदेसाय हांणी म्हणलें.

खूबशा जाणांनी समाजा खातीर काम केलां. तांच्या समाजीक कार्याचो भोवमान करूंक जाय. ह्या वर्सा म्हालांतल्यान एक अर्ज घेनासतना जांचो भोवमान जावपाची गरज आशिल्ली तांचो भोवमान केला. गोंय 14 वर्सां उसरां स्वतंत्र जालां. तरी लेगीत गोंय सगल्या मळार मुखार आसपाचें कारण आतांच्या ज्येश्ठ नागरिकांनी शिक्षणा सयत हेर क्षेत्रांतूय केल्लें काम अशें फळदेसाय हांणी म्हणलें.

देवा उपरांत आवय-बापायक मान दिवपी पिळगी आतां दिसून येना. विभक्त कुटूंब पद्दत येत सावन ज्येश्ठ नागरिकांचेर मानसीक, शारिरीक अन्यायांनी वाड जाल्ल्याचें दिसून येता. ज्येश्ठ नागरिकां कडल्यान जिल्होधिकारी कचेरेंत खटलो दाखल केले उपरांत तीन म्हयन्यांच्या काळांत तांकां न्याय मेळपाची गरज आसा अशी मााणी ज्येश्ठ नागरीक असोसिएशनाचे अध्यक्ष डायगो डिकॉस्टा हांणी केली.

डिकॉस्टा हांणी सांगलें, ज्येश्ठ नागरिकां वेले अन्याय, अत्याचारा आड ज्येश्ठ नागरीक असोसिएशना कडेन कागाळ आयले उपरांत ते कागाळी प्रमाण जिल्होधिकारी कचेरेंत कागाळ नोंद करतात आनी ती लढून ज्येश्ठ नागरिकांक न्याय दिवपाचें काम करतात. कांय वेळार ज्येश्ठ नागरिकां कडल्यान कागाळ केले उपरांत खटलो सुरू जाता. पूण जिल्होधिकारी कचेरेंत खटलो तीन ते चार वर्सां सुरूच उरता. मदल्या काळांत ज्येश्ठ नागरिकांक मरणूय येवपाच्यो घडणुको घडल्यात. उपरांत न्याय मेळून ताचो फायदो कितें असो प्रस्न करून असोसिएशनाचे अध्यक्ष डायगो डिकॉस्टा हांणी न्याय मेळोवपा खातीर काळाचें बंधन जाय आनी ताका लागून तीन चार म्हयन्यांत न्याय मेळचो अशी मागणी केली.

ज्येश्ठ नागरिकांक न्याय दिवपा खातीर पयशांची अडचण निर्माण जायत आशिल्ल्यान गोंय सरकारा कडल्यान कांय अर्थीक मजत करपाची मागणीय केली. गोंयांतल्या ज्येश्ठ नागरिकांक राज्य सरकारा कडल्यान अर्थीक मजत मेळटा, ताका लागून खूबशा जाणांची जीण सुखी जाल्या. गोंय सरकारा कडल्यान पेन्शनाची रक्कम येवपाक कळाव जायत आसलो तरी तो मेळटा, हाचो मोटो आदार ज्येश्ठ नागरिकांक जाता अशेंय डिकॉस्टा हांणी म्हणलें.

सद्याच्या धांवपळीच्या युगांत फाटल्यान उरिल्ल्यांक पळोवंक कोणाकूच वेळ ना. ताका लागून ज्येश्ठ नागरिकांचे समस्ये कडेन पळोवपाक कुटुंबांक वेळ नासता. ताका समाजा कडल्यान आदार मेळपाची गरज आसता. भुरग्यांनीय ज्या आवय-बापायन व्हड केल्यात तांकां विसरचे न्हय अशें आमदार दिगंबर कामत हांणी सांगलें.