ज्ञान- भुती
भांगरभूंय | प्रतिनिधी
कलम 144 म्हळ्यार कितें?
पुलीस संरक्षणांत बांदाचे बांदकाम सुरू जाले उपरांत मुर्डी – खांडेपार गांवकारांनी शेतकी मंत्री रवी नायक हांकां मेळून बांदाचेर चर्चा केली. कलम 144 रद्द करपाची आनी बांदाचें बांदकाम कामूय बंद करपाची मागणी केली.18 ऑगस्टा सावन पुलिसांच्या संरक्षणा खाला बांदाचें काम सुरू जालें. लोकां कडल्यान निशेध जावपाची भिरांत आशिल्ल्यान दक्षिण गोंय जिल्होधिकाऱ्यान वाठारांत 144 कलम लागू केलां.
कलम 144 म्हळ्यार?
एका थळाव्या वाठारांत व्हड गर्दी जमता तेन्ना समाजीक शांतताय अडचणींत येवपाची शक्यताय आसता. अशे परिस्थितींत त्या वाठारांत शांतताय स्थापन करपा खातीर आनी जमावाचेर नियंत्रण दवरपा खातीर तशेंच दंगल, लुटमार, हिंसाचार, मारपेट अशा कांय परिस्थितींत कलम 144 लागू करतात.
खंय तरी सामकी आणीबाणीची परिस्थिती निर्माण जाता तेन्ना जिल्लो न्यायालयीन दंडाधिकारी, कार्यकारी दंडाधिकारी, जिल्होधिकारी परिस्थिती नियंत्रणांत हाडपा खातीर बेगोबेग जमावबंदीची नोटीस जारी करतात.
वाठारांतली परिस्थिती नियंत्रणांत हाडपाक एक ते दोन म्हयने कलम 144 लागू करूं येता. नागरिकांच्या जिवाक धोको निर्माण करपी सुवातेर दंगल जावपाची परिस्थिती आसल्यार ती नियंत्रणांत हाडपा खातीर 5 म्हयने लेगीत जमावबंदी लागू करूं येता. आनी मागीर सगळी परिस्थिती नियंत्रणांत येतकच कलम 144 फाटीं घेतात.
कलम 144 काळांत नागरिकांनी पाळपाचे नेम
- जे सुवातेर जमावबंदी लागू केल्या थंय लोकांनी गर्दी करची न्हय. एकाच सुवातेर चार परस चड लोक जमूंक फावना.
- अशा सुवातेर आशिल्ल्या व्यक्तींनी घातक शस्त्रांची अदलाबदल करची न्हय वा तीं ताचे कडेन आसपाक जायनात.
- हांगाच्या लोकांक घरांतल्यान भायर येवंक मेळना आनी वाठारांत भोंवपाक मेळना.
कलम 144 पाळना जाल्यार कांय वर्सां बंदखणीची ख्यास्त जावंक शकता आनी सरकारान घाल्लो दंडूय तांकां भरचो पडटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
