भांगरभूंय | प्रतिनिधी
होंडा भगवान महावीर सरकारी हायस्कुलांत गुरू पुनव उमेदीन
वाळपय: गुरू पुनव हो दीस गुरुंच्या स्मरणाचो, आदराचो आनी कृतज्ञतायेचो आसता. जगांत ज्ञान आसा, पूण तें गुरू कडल्यान मेळ्ळें जाल्यारूच ताका दिशा मेळटा. शाळेंतलो दरेक गुरू हो तुमचे खातीर सदांच प्रेरणास्त्रोत आसतलो. गुरुंच्या मार्गदर्शनाक लागून विद्यार्थ्यांचो फुडार घडटा अशें उलोवप मुख्याध्यापिका मोनाली नायक हांणी केलें.
भगवान महावीर सरकारी हायस्कूल होंडा हांगा गुरू पुनव व्हड उमेदीन मनयली. ह्या सुवाळ्यांत त्यो उलयताल्यो. ह्या वेळार विवीध कार्यावळींचें आयोजन केल्लें.
कार्यावळीची सुरवात महर्षी व्यासांच्या फोट्याची पुजा आनी दिवली पेटोवन केली. विद्यार्थ्यांनी गुरुवंदना गीत सादर करून हाजीर आशिल्ल्यांक येवकार दिलो.
शाळेच्यो ज्येश्ठ शिक्षिका क्षमा गांवस, शिक्षक रामा नायक, कार्यावळीच्यो प्रभारी शिक्षिका दिप्ती गांवस माचयेर हाजीर आशिल्ल्यो.
ह्या वेळार क्षमा गांवस आनी रामा नायक ह्या शिक्षकांनी शिश्य परंपरेचे म्हत्व सांगलें. गुरुंच्या मार्गदर्शनाक लागून विद्यार्थी घडटात आनी विद्यार्थी घडले जाल्यार पुराय समाज घडटा अशें तांणी म्हणलें.
कार्यावळींत कांय विद्यार्थ्यांनी प्रीय शिक्षकां विशीं आपलें मनोगत उक्तायलें. कार्यावळीचो मुखेल भाग म्हणल्यार गुरुजनांचो भोवमान. सगल्या शिक्षकांक फूल तशेंच ग्रिटींग कार्ड दिवन भोवमान केलो. विद्यार्थ्यांनी गुरुजनांक वंदन करून कृतज्ञताय उक्तायली.
गुरू पुनव हो दीस विद्यार्थ्यांक संस्कार, आदर आनी नम्रता शिकोवपी थारलो. हे कार्याळीक लागून शिक्षक आनी विद्यार्थ्यां मदलें नातें आनीक घटमूट जालें.
पुराय कार्यावळीचें सुत्रसंचालन शिक्षिका स्मिता देसाय हांणी केलें जाल्यार, शिक्षिका दिप्ती सावंत हांणी सगल्यांचे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
