भांगरभूंय | प्रतिनिधी
‘यूपीएससी’वरवीं ४५ सुवातां खातीर जायरात प्रसिद्ध
नवी दिल्ली, खबरां संस्था: केंद्र सरकारांत जोड सचीव, संचालक आनी उपसचीव ह्या पदां खातीर परिक्षा घेनासतना विवीध मळावेल्या तज्ञांची बेगोबेग भरती करतले. संघ भौशीक सेवा आयोगान वेगवेगळ्या मंत्रालयांतल्यान ४५ रित्या पदांची जायरात जाहीर केल्या. हाका लागून वेगवेगळ्या मळार काम करपी लोकांक परिक्षा घेनासतना म्हत्वाच्या पदांचेर नेमपाची मोदी सरकाराची येवजण मुखारूय चालूच उरतली.
प्रशासन अदीक सुरळीत करपा खातीर नव्या प्रतिभावंतांचो नोकरेंत आस्पाव करून घेवपाचो म्हत्वाचे येवजणेचो हो एक भाग जावन आसा. हीं पदां भारतीय प्रशासन सेवा (आयएएस), भारतीय पोलीस सेवा (आयपीएस) आनी भारतीय वन सेवा (आयएफओएस) हे सेवेंतल्यान तशेंच गट अ वर्गाच्या सेवेंतल्यान भरतात. ‘यूपीएससी’न शेनवारा प्रसिद्ध केल्ले जायरातींत १० सहसचीव आनी ३५ संचालक आनी उपसचीव हांची भरती करतले. हे खातीर ऑनलायन अर्ज मागयल्यात. ही पदां तीन वर्सां खातीर भरतले. १७ सप्टेंबर मेरेन ‘यूपीएससी’चे वेबसायटीचेर अर्ज करपाक मेळटलें.
‘युपीएससी’वरवीं आयोजीत करपी नेमान परिक्षा दिनासतना ही नियुक्ती करतले. ती कंत्राटी आसतली. आतां मेरेन केंद्र सरकारान परिक्षे बगर केल्ली ही सगळ्यांत व्हडली भरती आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
