भांगरभूंय | प्रतिनिधी
भांगरभूंय । अजय लाड
मडगांवः दूद वेवसायांत इल्ले चड कश्ट घेतले जाल्यार अर्थीक स्वयंपूर्णता मेळटा, जी नोकरेंत मेळना. अशें मत बाणावलीच्या बासिलियो राटो ह्या तरणाट्यान उक्तायलें. एके गाये वयल्यान आतां 50 गाई- म्हशी पोसता, तेचवरी बोकड्यो पाळ्ळ्यात. तांच्या दूदाच्या वेवसायांतल्यान बरी अर्थीक जोड जाता. हेर तरणाट्यांनी लेगीत दूद वेवसाय आपणावचो, अशें बासिलियो म्हणटा.
नोकरी करून थारावीक काळा खातीर बरें उत्पन्न मेळपाक शकता, मात दूद वेवसायांत इल्ले चड कश्ट केले जाल्यार सासणा खातीर अर्थीक उत्पन्नाचो स्रोत निर्माण जाता, अशें बासिलियो सांगता.
घरांत दूद मेळचें, हे खातीर एक पोसपाक हाडिल्ली. गांवांतले लोकूय दूदा खातीर येवपाक लागले. ते उपरांत आनीक दोन गायी घेतल्यो, मात दूदाक मागणी चड आशिल्ल्यान मेळिल्ल्या फायद्यांतल्यान आनी 10 गायी घेतल्यो. अशें तरेन हो वेवसाय वाडलो, अशें बासिलियोन सांगलें. कोयर आनी घाणयाऱ्या उदकाक लागून गोरवांक धोको उप्रासता. हे खातीर लोकांनी घाणयारे उदक गटारांनी आनी कोयर रस्त्या कुशीक उडोवचो न्हय, असोय तांणी उलो मारलो.
सरकारी येवजण्यांचो लाव घेवचो
आतां मेरेन दुदाची विक्री गांवांतल्या लोकांक तशेंच डॅरींत केल्ल्या मेळिल्ल्या फायद्यांतल्यानूच गोरवां घेतलीं आनी तांचो खर्च केलो. स्वताच्या बोल्सांतलें चड पयशे मोडपाची गरजूच पडूंक ना. सरकारी येवजण्यांचो फायदो घेवन अनुदान मेळयलें. तशेंच मेळपी बोनसांतल्यान अर्थीक उत्पन्नांतल्यान हो वेवसाय केलो. दुदाचे खेपे प्रमाण पंदरा दिसांनी पयशे मेळटात. शेती वांगडा दुदाचो वेवसाय केल्यार आनी सरकारी येवजण्यांचो फायदो घेतलो जाल्यार शेतकारांच्या उत्पन्नांतूय वाड जावपाक शकता, अशें बासिलियो राटो हांणी सांगलें.
बोकड्यांच्या दूद विक्रींतल्यानूय खूब फायदो
गाई- म्हशींचें दूद बाणावली आनी सुरावलीच्या डॅरींक विकता, तशेंच कांय लिटर दुदाक गांवांतल्या लोकांची मागणी आसता. 15 दिसांत 15 ते 20 हजार रुपया उत्पन्न मेळटा. गायीच्या दुदाक लिटरा फाटल्यान 70 रुपया मेळटा, जाल्यार बोकडेचें दूद भलायके खातीर बरें आशिल्ल्यान एका लिटराक 200 रुपया इतलो दर मेळटा. ताका लागून बेगीन उत्पन्न वाडचें हे खातीर गायी- म्हशीं वांगडाच बोकड्योय पोसपाक सुरवात केली, अशें बासिलियो राटो हांणी सांगलें.
कोरोना काळांतूच उत्पन्न चालू आशिल्लें
कोरोना म्हामारीच्या काळांत सगळो संवसार थारिल्लो, पूण आपलो दुदाचो वेवसाय मात चालूच आशिल्लो. गाई- म्हशीचें दूद सद्दां काडचें पडटा, ना जाल्यार दूद उणें जाता. कोरोना काळांत नोकरी करप्यांच्यो नोकऱ्यो गेल्यो. अर्थीक उत्पन्न बंद जालें, पूण दूद वेवसायांतल्यान डॅरी आनी लोकांक दूद विकून अर्थीक स्रोत चालूच उरलो, अशें बासिलियोन सांगलें.
मेहनत करपाची तयारी दवरात
वेवसाय करतना नोकरे खातीर जितलो वेळ दितात तितलोच वेळ दिवचो पडटलो, पूण इल्ली चड मेहनत केली जाल्यारूच वेवसाय वाडत वतलो. गोरवां घेतलीं आनी तांची जापसालदारकी कामगारांचेर दिली जाल्यार हो वेवसाय फायद्यांत वच्चो ना. तांकां योग्य खावड, चरोवप आनी तांची भलायकेची जतनाय स्वता घेवपाची गरज आसा, असें बासिलियो राटो हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
