भांगरभूंय | प्रतिनिधी
नवी दिल्ली, खबरां संस्था ः चलयां आड अत्याचाराचीं प्रकरणां वाडत आसात. संवसारीक भलायकी संघटनेच्या ताज्या अहवालांतल्यान ही धक्को दिवपी गजाल मुखार आयल्या. फाटल्या वर्सा किशोरावस्था मदल्या दर स चलये मदल्या एका चलयेचेर जोडीदारा कडल्यान अत्याचार जाला. नात्यांत आशिल्लीं सुमार 24 टक्के म्हळ्यार 1 कोटी 90 लाख चलयो शारिरीक वा लैंगीक अत्याचाराचे बळी पडटात. विशेश म्हळ्यार ह्या चलयांक पिरायेच्या 20 वर्सां आदीं तांच्या जोडीदारां कडल्यानूच अत्याचार जावपाचे चड प्रकार आशिल्ल्याचे ह्या अहवालांत उजवाडाक आयला. संवसारीक भलायकी संघटनेच्या 15 ते 19 वर्सां पिरायेच्या चलयां विशींचो अहवाल लॅन्सेट ह्या संशोधन नेमाळ्यांत उजवाडाक आयला.
जोडीदाराकडल्यान अत्याचार ही भौशीक भलायकी आनी मानवी हक्कांची गंभीर समस्या. संवसारभर 15 ते 49 वर्सां पिरायेच्या गटांतल्या 27 टक्के चलयांक आनी बायलांक जिणेंत एकदा तारी तांच्या जोडीदारा कडल्यान शारिरीक वा लैंगीक अत्याचाराचो सामनो करचो पडटा. फाटल्या वर्सा 13 टक्के बायलांचेर अशें अत्याचार जाल्यात.
सध्याची स्थिती कितें?
किशोरवयीन चलयां आड जावपी हिंसाचाराचीं घडणुको संवसारभर दिसतात. ओशिनिया खंडांत हो आंकडो ४७ टक्के आनी मध्य आफ्रिकेंत हो आंकडो ४० टक्के आसा. युरोपांत 10 टक्के आनी मध्य आशियांत 11 टक्के आसा. कांय देशांनी ४९ टक्के किशोरवयीन चलयो अत्याचाराक बळी पडटात जाल्यार कांय देशांनी हो आंकडो 6 टक्क्यां मेरेन उणो आसा. जोडीदाराकडल्यान चलयां आड अत्याचार जावपाचे सगळ्यांत चड प्रमाण पापुआ न्यू गिनींत आसून तें 49 टक्के आसा. भारतांत हें प्रमाण 25 ते 34 टक्के आसा.
संवसारभर बालविवाह ही एक व्हडली समस्या. संवसारांतल्या दर पांच चलयेंतल्या एका चलयेचो बालविवाह जाता. बालविवाहाक लागून ह्यो चलयो आपलें शिक्षण पुराय करिनात. हाचे वांगडाच तांचे जोडीदाराच्या अत्याचाराक बळी पडपाचें प्रमाणय चड आसता.
मजगतीं, चलयां आड अत्याचार जावचे न्हय हे खातीर शिक्षणाचेर भर दिवप गरजेचें, चलयां खातीर माध्यमीक शिक्षण, मालमत्तेचेर समान हक्क, लैंगिक समानताय आनी बालविवाह हे कांय मुखेल उपाय आसा अशेंय अहवालांत नमूद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
