जोडलां तें व्हगडावपाचो घात !

भांगरभूंय | प्रतिनिधी

हरियाना आनी जम्मू कश्मीरांतल्यो वेंचणुको ह्यो देशांतली राजकी हवा बदलपी वेंचणुको थारतल्यो अशें राजकी निरिक्षकांक दिसता, आनी तातूंत चुकीचें अशें कांय ना.

लोकसभा वेंचणुकेच्या निकाला उपरांत विरोधी काँग्रेस पक्षाची सत्ते कडली वाटचाल खूबशी सुकर जायत चलिल्ल्याचो त्या पक्षाच्या फुडाऱ्यांचोच न्हय जाल्यार हेर विरोधी पक्षांचोय जो भ्रम जाल्लो तो पयस करपाचे काम हरियाना आनी जम्मू काश्मीरांत हालींच जाल्ल्या विधानसभा वेंचणुकेच्या निकालान केला. हरियाना आनी जम्मू कश्मीरांत काँग्रेस पक्षान खूब कितें व्हगडायलें. आतां जावपाच्या आशिल्ल्या महाराष्ट्र, झारखंड बी राज्यांतल्या विधानसभा वेंचणुकेंतूय काँग्रेसीच्या मार्गांत खूबशीं विघ्नां येवपाची शक्यताय न्हयकारूं येवचीं नात. महाराष्ट्रांत काँग्रेस पक्ष हालींच फ्रंटफुटार वचून भाजप आनी हेर पक्षांक हिणसावंक लागिल्लो. पूण हरियानांत तांकां अतिआत्मविस्वास नडलो आनी ताचे परिणाम म्हणल्यार महाराष्ट्रांत तांचेर आतां बॅकफुटार वचून लंगडी खेळपाची वेळ आयल्या. प्रधानमंत्री नरेंद्र मोदी आनी तांच्या भारतीय जनता पक्षान हरियानांत काँग्रेसीचेर काडिल्लो फोग पळयत जाल्यार विरोधी ‘इंडी’ आघाडी खातीर जबरदस्त धक्को दिवपी थारल्या. लोकसभा वेंचणुकेंत अपेक्षीत येस मेळूंक नाशिल्ल्यान भाजपान हरियानांतले वेंचणुकेंत अशी जादू केली की वट्ट राजकी वातावरणूच बदलून गेलें अशीच कितेंशी स्थिती निर्माण जाल्ली स्पश्टपणान जाणवूंक लागल्या. हरियानांत काँग्रेस पक्षान आपल्या वांगडी पक्षां कडेन मात्शी लेगीत तडजोड केल्ली जाल्यार आयचें राजकी चित्र वेगळेंच दिसपाचें. घडये महाराष्ट्रांतूय विरोधक खूबशें कितें करूंक शकपाचे. पूण वट्ट राजकी हवाच पुनश्च भाजपाक अनुकूल अशीच व्हांवतना स्पश्टपणान जाणवता.
काँग्रेस नेतृत्वान हरियाना आनी जम्मू काश्मीरांतूय आपल्याच पांयार कुराड मारून घेवपाचो जो उपद्व्याप केला ताचे वेल्यान ‘इंडी’ आघाडीतले खूबशे पक्ष तांचेर निरशेल्लें आसून ह्या पक्षाचेर भरवंसो कसो दवरचो हेंच तांकां कळनाशें जालां. आम आदमी पार्टीन जाल्यार काँग्रेसी पसून पयस रावपाकूच आपलें शाणपण केलां हें मान्य करून दिल्ली विधानसभा वेंचणूक स्वताच्या बळार लढोवपाचो निश्चेव केला. हातूंत अर्थांतूच भाजपाचें फावतलें आनी ताचो आनंद तांकां जावप सभावीक आसा. आमी हरियानांत फक्त चार ते पांच सुवातो मागिल्ल्यो आसतनाय काँग्रेसीन अतीआत्मविस्वासाच्या आहारी वचून ताका जो न्हयकार दिला ताचें कोणूच समर्थन करिना. काँग्रेस फुडारपणाक आतां आपली घोडचूक कळून आयिल्ली आसली तरी ताका आतां खूब कळाव जाला, आनी तातूंतल्यान सांवरप तांकां कठीण जालां. महाराष्ट्र, दिल्ली, झारखंडांत हालींच्या काळांत जावपी विधानसभा वेंचणुकेंत भाजप अदीक आत्मविस्वासान देंवपाचो आशिल्ल्यान आत्मविस्वासूच व्हगडावन बशिल्ल्या काँग्रेसीची आनीक फजिती जावपाची शक्यताय न्हयकारूं येना. हरियानांत वट्ट राजकी परिस्थिती भाजपा खातीर इतली प्रतिकूल जाल्ली की स्वता भाजपाकच सेगीत तिसरे फावटी सत्ता तिगोवप कठीण आशिल्ल्याची जाणीव जाल्ली. पूण खंयचे कितें काँग्रेसूच भाजपाक पावली आनी राज्य स्थापने उपरांत पयलेच फावटी सेगीत तिसरे फावटी सत्ता राखपाक तांकां येस आयलें. काँग्रेस पक्षांतली गटबाजी, मतभेद, असंतोष हाचो फायदो भाजपान घेतलो.
हरियाना आनी जम्मू कश्मीरांतल्यो वेंचणुको ह्यो देशांतली राजकी हवा बदलपी वेंचणुको थारतल्यो अशें राजकी निरिक्षकांक दिसता, आनी तातूंत चुकीचें अशें कांय ना. दोनूय कडले निकाल वेगळेवेगळे संकेत आनी तेवूय सामके स्पश्टपणान दितात. हरियानांतले वेंचणुकेचो धडो घेवन भारतीय जनता पक्ष महाराष्ट्र आनी हेर राज्यांत विरोधी आघाडीक मात दिवपा खातीर तशीच रणनिती आंखतली हातूंत दुबाव ना. दिल्लींत आम आदमी पक्षाचो भारदस्त किल्लो उद्धवस्त करपा खातीर भाजपा कडेन तसो खूबसो फोग तयार आसा. आदले मुख्यमंत्री आनी पक्षाचे सर्वेसर्वा अरविंद केजरीवाल हांचो 80-85 कोटींचो शिशमहल आनी हेर खूबश्यो गजाली भाजपाच्या भात्यांत आसात. शिशमहालाचे गुपीत भायर फुटचे न्हय हे खातीरूच शिश्टाचार प्रक्रियेक फांटो दिवन हो बंगलो थेट नव्यो मुख्यमंत्री आतिशीं कडेन सोंवपाचें कारस्थान केलें. पूण तेंवूय परतें आंगार आयलें. दिल्लींत भाजपाचे काम खूबशें सोंपें जातलें असोय अदमास आयज बांदतात. जाल्यार झारखंडांत झारखंड मुक्ती मोर्चाक सुरूंग लावपातूय भाजपान आघाडी घेतिल्ली दिसून येता. अर्थांतच भाजपा खातीर महाराष्ट्र जिखप हेंच आयज म्हत्वाचें आशिल्ल्यान ते खातीर कसलीच कसर बाकी दवरपाक भाजपा फाटीं रावचो ना हें थंयच्या महायुती सरकारान लोकहिता खातीर घेतिल्ल्या खूबशा निर्णयांतल्यान दिसून येता. हरियानांतल्या निकालान भाजपाक नवी उर्जा मेळ्ळ्या आनी थंयच्या महाविकास आघाडींत बिघाडी निर्माण करून आपलें ईप्सित साध्य करपांतूय भाजपा फाटीं फुडें करीत अशें दिसून येना.
हरियानांत काँग्रेस पक्षान केल्ली चूक जावची ना आनी अतिआत्मविस्वासान वांगडी पक्षांक दुय्यम लेखचे नात हाचे कडेनूय भाजपाक लक्ष दिवचें पडटलें. हरियानांतल्या निकालान सगल्या राजकी पक्षांक निश्चीतूच हो संदेश दिला, की दरेक वेंचणूक ही वेगळी आसता आनी ते खातीर तयारी करपा खातीर वट्ट राजकी परिस्थितीनुरूपच आसूंक जाय. काँग्रेसीन ह्या निकालांतल्यान कितें धडो घेतला हें महाराष्ट्र आनी हेर राज्यांतली तांची रणतिनी कितें आसतली हाचेर कळून येतलेंच पूण काँग्रेसीन हरियानांत खूब कितें व्हगडायलां हें मान्य करूनच तांकां मुखार वच्चें पडटलें. हरियाना आनी कश्मीर विधानसभा वेंचणूक निकालाचो परिणाम अप्रत्यक्षपणान महाराष्ट्र वेंचणुकेचेर जातलोच. ताका लागून काँग्रेसीक तर शितिदान पावलां घालचींच पडटलीं. उत्तर प्रदेश विधानसभेच्या धा मतदारसंघांत जावपी पोटवेंचणुकांचें मोटें आव्हान भाजपा खातीर आसतलें. तरी ह्या राज्यांत लोकसभा वेंचणुकेंत मेळयिल्ल्या येसाक लागून इंडी आघाडीचें काम सोंपें नासतलें. समाजवादी पक्षान काँग्रेसीक विस्वासांत घेनासना आदींच स सुवातांचेर आपले उमेदवार जाहीर केल्ल्यान मुखार नेमकें कितें जातलें हे विशीं खूबशे तर्कवितर्क लढयतात. बदलत्या राजकी हवेचो विचार करीत ‘इंडी’ आघाडीक आतां अशें कितें तरी करून दाखोवचें पडटलें की विरोधकां मदलो एकवट कायम आशिल्ल्याचो विस्वास लोकांक दिसचो. नाजाल्यार लोकसभा वेंचणुकेंत जें कितें व्हगडायलें तें सगलेंच व्हगडावन बसपाची पाळी तांचेर येवंक शकता. घोडामैदान आतां लागींच आसा.

वामन प्रभू
9823196359