जोकोवीच सेमी फायनलींत

भांगरभूंय | प्रतिनिधी

सर्बियाचो टॅनीस स्टार नोवाक जोकोवीच आनी अमेरिकेचो युवा खेळगडो कोको गॉफ हांणी अमेरिकन ओपनाचे सेमी फायनलींत सुवात मेळयली.

दादल्यांच्या एकोड्या गटांतले क्वॉर्टरफायनलींत जोकोवीचान टेलर फ्रिट्जाक हारयलो. जोकोवीच 13वे खेपे अमेरिकन ओपनाचे आनी वट्ट 47वे खेपे सेमी फायनलींत सुवात मेळयली. (चारूय ग्रॅण्ड स्लॅम धरून). जोकोवीच 17वे खेपे अमेरिकन ओपनांत खेळटा.

जोकोवीचान टेलराक 6-1, 6-4 आनी 6-4 अशा सरळ सेटांनी हारयलो. तीन खेपेचो अमेरिकन ओपनाचो वस्ताद जोकोवीच सेमी फायनलींत अमेरिकेच्या बेन शेल्टना आड खेळटलो. शेल्टन पयले खेपे ग्रॅण्ड स्लॅम सर्तीचे सेमी फायनलींत पावला. शेल्टनान क्वॉर्टरफायनलींत आपल्याच देशाच्या फ्रान्सीस टियाफोक हारायलो.

बायलांच्या एकोड्या गटांतले क्वॉर्टरफायनलींत गॉफान संवसारीक क्रमवारींत पयले सुवातेर आशिल्ले इगा स्वियातेकाक हारोवपी ओस्टापेंको आड जैत जोडलें. गॉफान 2017त फ्रॅंच ओपन जिखपी ओस्टापेंकोक 6-0 आनी 6-2 अशा सरळ सेटांनी हारयली. गॉफ पयले खेपे अमेरिकन ओपनाचे सेमी फायनलींत सुवात मेळयली.

रोहन बोपन्ना सेमींत

रोहन बोपन्ना- मॅथ्यू एबडेन हे जोडयेन दादल्यांच्या दोट्टी गटाचे सेमी फायनलींत सुवात मेळयली. भारत-ऑस्ट्रेलियेचे जोडयेन क्वॉर्टरफायनलींत नथानिएल लॅमन्स आनी जॅक्सन विथ्रो हे अमेरिकेचे जोडयेक 7-6 (10) आनी 6-1 अशा सरळ सेटांनी हारयली.