भांगरभूंय | प्रतिनिधी
सर्बियाच्या नोवाक जोकोवीचान अमेरिका ओपनाचे तिसरे फेरयेंत सुवात मेळयली. ताणें आपल्याच देशाच्या लासलो जेरेक 3-2 फरकान हारयलो. तीन वरां आनी 45 मिनटां मेरेन चलिल्ले मॅचींत जेरेक 4-6, 4-6, 6-1,6-1 आनी 6-3 अशा पांच सेटांनी हारयलो.
जोकोवीच दोन सेटांनी फाटीं पडून लेगीत जबरदस्त पुनरागमन केलें. जोकोवीचान कठीण जैता उपरांत पत्रकारां कडेन उलयतना म्हणलें, साबार वर्सांनी आपल्याक कठीण मॅचींत तोंड दिवचें पडलें. जेरेन उत्कृश्ट खेळ केलो.
मॅचीचे सुरवातीच्या 90 मिनटांच्या खेळांत जेरेन लांब रॅली करून आघाडी राखली. ताणें बेसलायनीचेर हिटींग करून जोकोवीचाक फाटीं धाडून ताचें संतुलन इबडायलें. पूण, अणभवी जोकोवीचान तिसऱ्या सेटांत आपल्या खेळाचो पांवडो वाडयलो आनी जेरेक चुकी करपाक लावन मॅच आपल्या नांवार केली.
जोकोवीचान तिसऱ्या सेटांत 26 शॉर्टांची उमळशीक वाडोवपी रॅली जिखून पयले खेपे 1-0 अशी सर्व्हीस ब्रेक केली. ते उपरांत जोकोवीचान प्रेक्षकांक आपल्याक तेंको दिवपाची मागणी केली. ते उपरांत ताणें सेगीत दोन सेट जिखून मॅचींत बरोबरी सादली. पांचव्या सेटांत जेरेच्या सर्वोत्कृश्ट यत्नां उपरांत लेगीत जोकोवीचान उत्कृश्ट डिफॅन्स दाखयलो आनी आपले सर्व्हिसीचेर जैत जोडलें.
जेरे दोन सेटां उपरांत थकलो कसो दिसलो तरी ताणें ताचो परिणाम खेळाचेर जावपाक दिलो ना. तिसऱ्या आनी चवथ्या सेटा परस पांचव्या सेटांत ताणें बरो खेळ केलो. ताणें बॉल स्विंग करपाक सुरवात केल्ली. ब्रेक पॉयण्टांत फाटीं आसून लेगीत ताणें बरी सर्व्हिस केली अशें जोकोविचान मुखार म्हणलें.
जोकोवीच फुडले फेरयेंत पात्रताय फेरी हुपून आयिल्ल्या क्रोएशियाच्या बोर्ना गोजो आड खेळटलो. ताणें तिसरे फेरयेंत झेक प्रजासत्ताकाच्या जिरी वेस्लीक 6-4, 6-3 आनी 6-2 अशा सहळ सेटांनी हारयलो.
मजगतीं, अमेरिकेच्या जॉन इस्नॅरान टॅनिसांतल्यान निवृत्ती घेतली. सर्त सुरू जावचे पयलींच ताणें आपली ही निमाणी सर्त आसतली अशें जाहीर केल्लें. इस्नॅराचें आव्हान दुसरेच फेरयेंत सोंपलें. टॅनीस खेळ आपले जिणेंत म्हत्वाचो भाग आसा ताका सोडप कठीण आसा. पूण, 38 वर्सां पिरायेचेर प्रतिस्पर्धी सर्तींत खेळप सोंपें ना. केन्नातरी निवृत्ती घेवपाकूच जाय, ती आतां घेतली अशें ताणें म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
